एक महिना भिट्रे अक्सिजन प्लान्ट सञ्चालनमे अइना

पहुरा समाचारदाता
धनगढी, २० भदौ । आबके एक महिना भिट्रे सेती प्रादेशिक अस्पतालमे अक्सिजन प्लान्ट जडानके कार्य ओरैना अस्पताल जनैले बा । अक्सिजनके अभावमे कोरोना संक्रमितके मृत्यु हुइ लागलपाछे अस्पतालमे २ हजार लिटर क्षमताके अक्सिजन प्लान्ट जडान करे लागल हो ।

अस्पतालके सुचना अधिकारी दिलिप कुमार श्रेष्ठके अनुसार अक्सिजन प्लान्ट पूर्ण रुपमे सञ्चालन अइना आभिन एक महिना लग्ना हुइल हो । संघिय सरकारके बजेटमे सेती अस्पतालमे अक्सिजन प्लान्ट जडान हुइ लागल हो । कोरोनाके डुसरा लहरके समयमे अक्सिजन नैपाके कतिपय कोरोना संक्रमित ज्यान गुमाइल रहिट ।

उहे समस्या आइ नैडेहक लाग सेती प्रादेशिक अस्पतालमे दुई हजार लिटर क्षमताके अक्सिजन प्लान्ट जडान करे लागल अस्पतालके सुचना अधिकारी दिलिप कुमार श्रेष्ठ जानकारी डेलै । “अक्सिजन प्लान्ट जडान कार्य सुरु हुइल बा,”उहाँ कहलै,“ कतिपय सामाग्री आइल नैहो प्लान्ट सञ्चालनमे अइना आभिन एक महिनासम लागी ।”

इ प्लान्ट सञ्चालनमे आइलसंगे अक्सिजनके अभावमे कौनो फेन संक्रमित व्यक्ति ज्यान नैगुमैना उहाँके कहाइ बा ।