मञ्चसे प्रजिअ मार्फत प्रधानमन्त्रीहे ज्ञापनपत्र

पहुरा समाचारदाता
कञ्चनपुर,२० भदौ । मुक्त कमलरी विकास मञ्च कञ्चनपुर शाखासे प्रमुख जिल्ला अधिकारीमार्फत प्रधानमन्त्रीहे २२ बुँदे ज्ञापनपत्र बुझैले बा ।

मञ्चके जिल्ला अध्यक्ष सीता चौधरीके नेतृत्वमे गैल मुक्त कमलरीहुकनके टोली कञ्चनपुर जिल्ला प्रशासन कार्यालय पुगके प्रमुख जिल्ला अधिकारी राम प्रसाद पाण्डे मार्फत प्रधानमन्त्री शेरबहादुर देउवाहे ज्ञापनपत्र बुझाइल रहिट । प्रमुख जिल्ला अधिकारी पाण्डे मञ्चसे बुझाइल ज्ञापनपत्र प्रधानमन्त्री कार्यालयहे पठैना बटैलै ।

ज्ञापनपत्रमे मुक्त कमलरी पुनस्र्थापना आयोग गठन करके मुक्तकमलरीहुकाके पुनस्र्थापना करे पर्ना, नाम छुट हुइल वास्तविक मुक्तकमलरीहुकनके नामावली सरकारी लिष्टमे समावेश करके प्रमाणीकरण करे पर्ना, सरकारी परिचयपत्र पैना बाँकी रहलहुकनहे परिचयपत्र वितरण करे पर्ना, नेपाल सरकारसे मुक्तकमलरीहुकनके तथ्याङक संकलन तथा अध्यावधिक करे पर्ना, मुक्तमलरीहुकनके लाग सीप विकासके लाग बजेट विनियोजन करके लागु करे पर्ना, १० बुँदे सहमति कार्यान्वयन करे पर्ना माग करल बा ।

ओस्टेक शिक्षा निर्देशिक २०६८ संशोधन करके छात्रवृति बृद्धि करे पर्ना, अनुदानसहित सीपमुलक तालिमके व्यवस्था करे पर्ना, मुक्त कमलरीहुकनके सीप विकास तथा आत्मनिर्भरताके लाग १८ से ३६ महिने तालिमके व्यवस्था करे, मुक्तकमलरीहुकनके पुनस्र्थापना लक्षित बजेट तथा कार्यक्रम लागु परे पर्ना, मुक्तकमलरीहुकनके लाग प्राविधिक शिक्षा निशुल्क अध्ययनके लाग सिटिईभिटी मार्फत विशेष कोटाको व्यवस्था करे पर्ना ।

मुक्तकमलरीहुकनहे स्नातकोत्तर तहसम निःशुल्क अध्ययनके व्यवस्था करे पर्ना, नेपाल सरकारके ओरसे सीपसिखल मुक्तकमलरीहुकनके स्वरोजगार तथा आत्म निर्भरताके लाग एक चो लाग प्रतिव्यक्ति तीन लाख अनुदानके रुपमे प्रदान करजाए । प्राविधिक शिक्षा ओ क्याम्पस शिक्षा पास करल मुक्तकमलरीहुकनहे लोकसेवा ओर सरकारी जागिरमे विशेष कोटाके व्यवस्था करे पर्ना, मुक्तकमलरीहुकनके लाग लोकसेवा तयारी कक्षाके लाग बजेट विनियोजन करे पर्ना माग करल बा ।

मुक्तकमलरीहुकनहे स्वरोजगार तथा आत्मनिर्भर बनाइक लाग मुक्तकमलरीहुकन मार्फत संचालित सहकारीहुकनहे घुम्ती कोष संचालनके लाग प्रति सहकारी १५ लाख अनुदानके व्यवस्था करेपर्ना, स्थानीय तह अन्र्तगत रहल विद्यालयमे समयमे छात्रवृति रकम निकासा करेपर्ना, कम्प्यूटर डिप्लोमा तालिमके लाग बजेट तथा तालिम व्यवस्था करेपर्ना, हत्या करलहुकनहे न्याय ओ वेपत्ता मुक्तकमलरीहुकनमे खोजी करेपर्ना, कुवारी डाई बनल मुक्तकमलरीहुकन ओ ओइनके सन्तानहे न्याय ओ पहिचान डेहेपर्ना, अन्तिम एक चो लाग प्रति व्यक्ति २ कटठासे १० कटठासम जमिन उपलब्ध कराईपर्ना, छात्रावासमे अध्ययनरत मुक्तकमलरीहुकनके लाग १२ महिनाभर आवसिय सुविधा प्रदान करेपर्ना माग कैगिल बा ।