भारतसँग नेपाल २–१ से पराजित

काठमाडौं, २० भदौ । भारतविरुद्धके दोसर मैत्रीपूर्ण खेलमे नेपाल पराजित हुइल बा । अँट्वार साँझ दशरथ रंगशालामे हुइल खेलमे भारत नेपालउप्पर २–१ गोलके जित निकारल हो ।

भारतके जितमे फारूख चौरधी ओ कप्तानी सुनिल क्षेत्री एक÷एक गोल करलैं । नेपालके लाग तेज तामाङ गोल फर्कैलैं । दोसर हाफमे मैदान छिरल चौधरी खेलके ६२ मिनेटमे गोल करले रहैं । डिबक्सभित्तर अनमार्क रहल उहाँ सटिक फिनिसिङ करले रहैं ।

८० मिनेटमे भारतीय कप्तान सुनिल क्षेत्री अग्रता दोब्बर परलैं । काउन्टर आक्रमणमे उहाँ सहज रूपमे गोल करले रहैं । नेपालके लाग तेज खेल ओरैना तीन मिनेट बाँकी रहलमे गोल फर्कैलैं । उहाँ ८७ मिनेटमे डिबक्स बाहिरसे सुन्दर गोल करले रहैं ।

खेलमे नेपाल कैचो गोल करना अवसर खेर करले रहे । दुनु हाफमे मनिष डाँगी गोल करे नैसेक्लैं ।
पहिल हाफमे डाँगी डिबक्समे पास पैलेसे फेन अल्मलाइल रहैं । दोसर हाफमे डाँगीके प्रयास सफल हुइ नैसेकल । उहाँ लम्मा पासमे सिक्सयार्डसे मारल प्रहार आउट हुइल रहे ।

यीआघे बिफेक रोज हुइल पहिल मैत्रीपूर्ण खेल एक÷एक गोलके बराबरीमे ओराइल रहे । नेपालके लाग अन्जन विष्ट गोल करले रहैं कलेसे भारतके अनिरुद्ध थापा बराबरी गोल फर्कैले रहैं ।

दुनु टिम आगामी महिना माल्दिभ्समे हुइना साफ च्याम्पियनसिपके तयारीस्वरूप मैत्रीपूर्ण खेल खेलल हो । आब नेपाली टिम साफ च्याम्पियनसिपके तयारी करे कतार जाइ । उहाँ १५ दिन तयारी करलपाछे नेपाली टिम ओहैंसे माल्दिभ्स पुगि ।