थारू भाषाहे प्रदेश २ के सरकारी कामकाजके भाषा बनाइ पर्ना जोड

पहुरा समाचारदाता
सप्तरी, २१ भदौ । थारू भाषाहे प्रदेश नम्बर २ के सरकारी कामकाजके भाषा बनाइ पर्ना जोड डेले बाटै ।

सप्तरीके खडक नगरपालिकामे शनिच्चरके आयोजित एक अन्तरक्रिया कार्यक्रमके वक्ताहुक्रे ओइसीन जोड डेहल हुइट । थरूहट थारूवान राष्ट्रिय मोर्चा सप्तरी ओ थारू कल्याणकारी सभा सप्तरीसे कल्याणपुरमे संयुक्त रुपमे आयोजित थारू भाषा उपरके आक्रमण तथा भाषा आयोगके भूमिका बिषयक अन्तरक्रिया कार्यक्रममे बोल्टी जोड डेहल हुइट ।

कार्यक्रममे बोल्टी वक्ताहुक्रे थारू भाषाहे प्रदेश नम्बर २ के सरकारी कामकाजके भाषा बनाइ पर्ना औंल्याइल रहिट । प्रदेश २ मे थारू लगायतके बहुसंख्यक समुदायसे थारू भाषा बोल्न हुइल ओरसे सरकारी कामकाजके भाषा थारू हुइ पर्ना उहाँहुक्रनके जोड रहे । प्रदेश २ मे बहुसंख्यक समुदायसे बोल्न स्थानीय भाषा थारू भाषा नै हो । इ प्रदेशमे ७५ प्रतिशतसे ढिउरजे थारू भाषा प्रयोग कैके बोलचाल करठै ।

भाषा आयोगसे मैथिली ओ अबधी भाषाहे सरकारी कामकाजके भाषा सम्बन्धि लानल प्रतिबेदनप्रति आपत्ति जनैटी बक्ताहुक्रे भाषा आयोगके नीति प्रदेश २ मे थारू भाषाहे पाखा लगैना षड्यन्त्र रहल आरोप लगैलै । उहाँहुक्रने थारू भाषाहे प्रदेश २ के सरकारी कामकाजके भाषा नैबनैलेसे आन्दोलन कैना चेतावनी डेलै । सरकारसे थारू भाषाउपर आक्रमण जारी रख्लेसे चुप लागके नैबठे सेक्ना उहाँहुक्रे बटैलै ।

अन्तरक्रिया कार्यक्रममे थरूहट थारूवान राष्ट्रिय मोर्चाके केन्द्रिय संयोजन समितिके कार्यबाहक संयोजक श्रवण थारू, नेपाल आदिवासी जनजाति महासंघ सप्तरीके अध्यक्ष बृजमान तामाङ, पूर्व अध्यक्ष महेन्द्र प्रसाद चौधरी, थरूहट थारूवान राष्ट्रिय मोर्चा केन्द्रिय सदस्य रामचन्द्र चौधरी, डा. कबिरदास चौधरी, थारू भाषाविद् एवम् प्राध्यापक महेश कुमार चौधरी, थरूहट थारूवान राष्ट्रिय महिला मोर्चाके सह–संयोजक उमा चौधरी, प्रधानाध्यापक तुलसीदास चौधरी लगायत प्रदेश २ मे थारू भाषाहे सरकारी कामकाजके भाषा बनाइ पर्ना बिचार व्यक्त करलै ।

ओस्टके थारू कल्याणकारी सभा सप्तरीके सभापति शिव नारायण थारू, थरूहट थारूवान राष्ट्रिय मोर्चा सप्तरीके संयोजक ईशु लेखी, थारू अभियन्ता तथा बुद्धिजिवी पूर्ण प्रसाद चौधरी, थारू युवा नेता मिलन चौधरी, शिक्षक पन्नालाल चौधरी, सिरहाके बिरेन्द्र चौधरी, हरिप्रसाद चौधरी, जयप्रकाश चौधरी, बिनोदान्द चौधरी, योगेन्द्र चौधरी थारू भाषाउपर घात हुइलेसे आन्दोलन करे पर्ना धाराणा राखल रहिट ।

उ अन्तरक्रिया कार्यक्रममे सप्तरी, सिरहा, उदयपुरके थरूहट थारुवान राष्ट्रिय मोर्चाके प्रतिनिधि, थारू कल्याण कारिणी सभाके केन्द्रिय तथा जिल्ला पधाधिकारी, थारू अगुवा बुद्धिजिवी तथा भाषाविद्हुक्रनके सहभागिता रहल रहे ।