संखुवासभा हत्या प्रकरण: घटनास्थलमे तालिम प्राप्त कुकुरसहितके प्रहरी टोली परिचालन
विराटनगर, २१ भदौ । संखुवासभाके मादी नगरपालिका १ के उम्लिङमे एक्के परिवारके ६ जानेक हत्या हुइल घटनाके अनुसन्धानके लाग तालिम प्राप्त कुकुरसहितके प्रहरी टोली परिचालन करल बा ।
घटनाके जानकारी पाइललगत्तै अनुसन्धानके लाग संघीय प्रहरी कार्यालय धरानके एसपी भीम दाहालके नेतृत्वमे तालिम प्राप्त कुकुरसहितके टोली खटल प्रदेश नम्बर १ के प्रहरी प्रवक्ता तथा प्रहरी उपरीक्षक नवीनराज राई जानकारी डेलै ।
‘घटनाके जानकारी प्राप्त हुइटीकी एसपी साबके नेतृत्वमे तालिम प्राप्त कुकुरसहितके टोली घटनास्थलओर प्रस्थान करले बा,’ प्रहरी प्रवक्ता राई कहलै, तालिम प्राप्त कुकुरके सहयोगमे घटनाके सुक्ष्म अनुसन्धान हुई ।’ घटनामे संलग्न ओ घटनाके वास्तविकता हाली बाहेर नन्ना उहाँ बटैलै ।
प्रहरी घटनामे संलग्न नउम्किट कहिके सतर्कता अपनैले बा । एसपी राईके अनुसार घटना संलग्न भागे सेक्ना सम्भावित नाकामे निगरानी बढाइल बा ।
प्रहरीके अनुसार ६ जनहनहे धरयार हतियारसे मारके हत्या करल पाइल बा । परिवारके कुछ सदस्यके घरभिटर ओ कुछके शव घर बाहेर फेला परल बा । परिवारके एक जाने वृद्ध सदस्य भर जोगल प्रहरी बटैले बा । उहाँ घाहिल बटै । उहाँ आँखीफे नइदेख्न ओ कानफे नइसुन्ना अवस्थाके रहल बटाइल बा ।
मृत फेला परुइयामे उ स्थान घर रहल ८४ बर्षीया पार्वती कार्की, ५२ बर्षीय तेज बहादुर कार्की, ५२ बर्षीया कमला कार्की, ३२ बर्षीया रञ्जना कार्की, ११ बर्षीय दिपेन कार्की ओ ७ बर्षीया गोमा कार्की रहल बटै ।
