अपांगता रहल व्यक्तिनहे राहत वितरण
पहुरा समाचारदाता
अत्तरिया, २३ भदौ । कैलालीके गोदावरी नगरपालिकाभिटरके अपांगता रहल व्यक्तिहुकनहे राहत वितरण करल बा ।
ईम्प्याक्ट नेपाल सुदूरपश्चिम सामुदायिक कान उपचार केन्द्र अत्तरियासे नगरभिटरके ९० अपांगता रहल व्यक्तिके घरपरिवारके लाग नगरपालिकाहे राहत उपलब्ध करैले रहे ।
उ राहत सामग्री बुधके नगरके १२ वडामे रहल ९० जाने अपांगता रहल व्यक्तिहुकनहे वितरण करल हो ।
कोरोना महामारीके कारण समस्यामे परल अति विपन्न परिवारके अपांगता रहल व्यक्तिके लाग राहत उपलब्ध कराइल ईम्याक्ट नेपाल सुदूरपश्चिम सामुदायिक कान उपचार केन्द्र अत्तरियाके परियोजना अधिकृत राम बहादुर बोगटी बटैलै ।
उहाँ नगरमे रहल अपांगतासम्बन्धी कार्य कैना संघसंस्थासंगके सहकार्यमे अति विपन्न व्यक्तिहुकनहे छनौट करके राहत उपलब्ध कराइल उहाँ बटैलै । सिबिएमके आर्थिक सहयोग वितरण करल राहतमे प्रतिव्यक्तिहे २५ किलो चामल, २ किलो दाल, २ किलो चिनी, २ किलो नोन, २ ठो साबुन ओ २ लिटर तेल वितरण करल बोगटी बटैलै ।
राहत सामग्री बुझ्टी गोदावरी नगरपालिका वडा नं. २ के स्थानीय लक्ष्मण विक राहत सामग्रीसे अपांगता रहल व्यक्तिके दैनिकीमे सहजता नानल बटैलै ।
उहाँ कोरोना महामारीके समयमे अपांगता रहल व्यक्ति मर्कामे परल अवस्थामे ईम्प्याक्ट नेपालसे करल सहयोग सह्रानिय रहल बटैलै । उहाँ अभिनफे अपांगता रहल व्यक्तिहुकनहे ईम्प्याक्ट नेपालके सहयोग रहना विश्वास लेहल बटैलै ।
महामारीके समयमे अपांगता रहल व्यक्तिहुकनहे तिनु तहके सरकारसे हुई पर्ना आवश्यक सहयोग नइपाइल बटैटी उहाँ आगामी दिनमे सरकारसेफे सहयोगके अपेक्षा लेहल बटैलै ।
ईम्याक्ट नेपाल सुदूरपश्चिम सामुदायिक कान उपचार केन्द्र अत्तरियाके परियोजना अधिकृत बोगटी गोदावरी नगरपालिकाके प्रमुख प्रशासकिय अधिकृत देवराज जोशीहे राहत सामग्री हस्तान्तरण करले रहिट ।
ओस्टेक उ राहत सामग्री नगरके १२ वडासे छनौट करल अपांगता रहल व्यक्तिहुकनहे वितरण करल रहे ।
