भागरथी भट्टके सम्झनामे अक्षय कोष स्थापना

बैतडी, २३ भदौ । बलात्कारपाछे हत्या करल बैतडीके भागरथी भट्टके सम्झनामे अक्षय कोष स्थापना करल बा । निजामती कर्मचारी मिलन केन्द्र बैतडीमार्फत जिल्लामे कार्यरत सरकारी कर्मचारीहुक्रे भागरथीके परिवारहे सहयोग कैना उद्देश्यसे रकम संकलन करल रहिट । उहाँहुक्रे संकलन करल १ लाख २० हजार रकम मंगरके हस्तान्तरण करल हो ।

१८ औं निजामती सेवा दिवसके अवसरमे निजामती कर्मचारी परिवार बैतडीसे आयोजना करल कार्यक्रममे प्रमुख जिल्ला अधिकारी राजेन्द्रदेव पाण्डे भागरथी पह्रल २ विद्यालयमे ६०÷६० हजारके अक्षय कोष स्थापनाके घोषणा करल हुइट ।

कक्षा १ से १० सम अध्ययन करल दोगडाकेदार गाउककपालिका–७ के भूमिराज मावि ओ कक्षा १२ मे अध्ययन करटी आइल दोगडाकेदार गाउककपालिका–३ मे रहल सनातन धर्म माविमे कोष स्थापना करल बा । कोषके विधान निर्माण कैके विद्यालयमे अध्ययनरत गरिब, दलित ओ जेहेन्दार विद्यार्थीहे हरेक बरस छात्रवृत्ति प्रदान करजैना उहाँ बटैलै ।

दोगडाकेदार गाउँपालिका–७ चडेपानीके भागरथी सनातन धर्म माविमे कक्षा १२ मे पह्रटी रहल रही । गैल बरस माघ २२ गते घरसे १ घण्टाके पैदल दूरीमे रहल विद्यालय गैल उहाँ साँझसे बेपत्ता हुइल रही । माघ २३ गते ओहकान शव चडेपानीके खोचलेक–चडेपानी ग्रामीण सडकके लबलेक जंगलमे फेला परल रहे ।