भदौं २७ गते थारु समुदायके अट्वारी, लुम्विनी प्रदेश सरकारसे सार्वजनिक विदा

पहुरा समाचारदाता
दाङ, २४ भदौ । थारु समुदायसे बड्का अट्वारी पर्व यिहे भदौ २७ गते घुमघामके साथे मनैना हुइल बटै ।

आगी ओ बर्किमारके प्रमुख पात्र भिवाहे पूजा कैना अट्वारी पर्व थारु समुदायके कृष्ण जन्माष्टमी पाछेक दुसरा अट्वारके मनाजाइठ । यी पर्व थारुहुकनके संस्कृति ओ परम्परा अनुसार अट्वारीके पहिल दिन आगीके पूजा करके रोटी ओ फलाहार करजाइठ ।

भिवा थारुहुकनके धार्मिक ग्रन्थ बर्किमार (हिन्दु ग्रन्थ महाभारत) के पात्र पाण्डवके मन्झला भैया हुइट । उहाँ थारुहुकनहे बिशेष ओ अग्रणी भूमिकासाथ सहयोग करल मान्यता बा । उहाँहे थारु समुदायसे देवताके रुपमे अट्वारीमे पूजा कैना चलन रहल धार्मिक बिश्वास बा । अँटवारी पर्व दुई दिन मनैना ओ भोज व्याह हुइल चेलिनहे अग्रासन डेना चलन रहल बा ।

लुम्विनी प्रदेश सरकारसे २७ गते अँटवारीके सार्वजनिक विदा

लुम्विनी प्रदेश सरकारसे थारु समुदायके बड्का अट्वारी पर्वके अवसरमे भदौै २७ गते सार्वजनिक विदा डेना हुइल बा ।

आन्तरिक मामिला तथा संचार मन्त्रालयके सचिव रविलाल पन्थ अट्वारीमे सार्वजनिक विदा डेना निर्णय हुइल बटैलै । उहाँक अनुसार आज बेलुका या काल्हसम मन्त्रालयके वेवसाइटमे सार्वजनिक विदा बारे सूचना प्रकाशित कैजाई ।

दाङ, वाँके ओ वर्दियाके थारु समुदायहे भदौं २७ गते अँटवारके दिन सार्वजनिक विदा डेहल उहाँ जानकारी डेलै ।