सुदूरपश्चिम ओ लुम्विनी प्रदेश सरकारसे सार्वजनिक विदा
पहुरा समाचारदाता
धनगढी, २४ भदौ । थारु समुदायसे बड्का अट्वारी पर्व यिहे भदौ २७ गते घुमघामके साथे मनैना हुइल बटै ।
आगी ओ बर्किमारके प्रमुख पात्र भिवाहे पूजा कैना अट्वारी पर्व थारु समुदायके कृष्ण जन्माष्टमी पाछेक दुसरा अट्वारके मनाजाइठ । यी पर्व थारुहुकनके संस्कृति ओ परम्परा अनुसार अट्वारीके पहिल दिन आगीके पूजा करके रोटी ओ फलाहार करजाइठ ।
भिवा थारुहुकनके धार्मिक ग्रन्थ बर्किमार (हिन्दु ग्रन्थ महाभारत) के पात्र पाण्डवके मन्झला भैया हुइट । उहाँ थारुहुकनहे बिशेष ओ अग्रणी भूमिकासाथ सहयोग करल मान्यता बा । उहाँहे थारु समुदायसे देवताके रुपमे अट्वारीमे पूजा कैना चलन रहल धार्मिक बिश्वास बा । अँटवारी पर्व दुई दिन मनैना ओ भोज व्याह हुइल चेलिनहे अग्रासन डेना चलन रहल बा ।
सुदूरपश्चिम ओ लुम्विनी सरकारसे सार्वजनिक विदा
थारु समुदायसे यिहे भदौ २७ गते घुमघामके साथे मनैना बड्का अट्वारी पर्वके अवसरमे एक दिन सार्वजनिक विदा घोषणा करले बा ।
प्रदेश सरकारसे मन्त्री परिषदके मिति २०७८ बैशाख १९ के निर्णण अनुसार भदौ २७ गते कैलाली ओ कञ्चनपुरमे एक दिन अट्वारी पर्वके विदा डेना निर्णय हुइल प्रदेश सरकारके सचिव चुडामणि पौडेल बटैलै ।
प्रदेश सरकार प्रदेश राजपत्र भाग ३ मे सूचना प्रकाशित करटी भदौ १४ गते कृष्णाजन्म अष्टमी, भदौ २७ गते अँटवारी, कुवाँर ३१ गते डशिया, पुष १८ गते भुवा पर्वमे अछाम, बाजुरा ओ बझाङ जिल्लामे केल, माघ २ गते माघी पर्व विदा, चैत ११ गते खखेहरा पर्व (रानाथारु समुदाय) कैलाली, कञ्चनपुरमे विदा डेना निर्णय करसेकल बा ।
ओस्टेक लुम्विनी प्रदेश सरकारसे २७ गते अँटवारी पर्वके अवसरमे सार्वजनिक विदा डेना निर्णय करले बा ।
आन्तरिक मामिला तथा संचार मन्त्रालयके सचिव रविलाल पन्थ अट्वारीमे सार्वजनिक विदा डेना निर्णय हुइल बटैलै । उहाँक अनुसार आज बेलुका या काल्हसम मन्त्रालयके वेवसाइटमे सार्वजनिक विदा बारे सूचना प्रकाशित कैजाई ।
दाङ, वाँके ओ वर्दियाके थारु समुदायहे भदौं २७ गते अँटवारके दिन सार्वजनिक विदा डेहल उहाँ जानकारी डेलै ।
