थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०८ कुँवार २६४५, शुक्कर ]
[ वि.सं ८ आश्विन २०७८, शुक्रबार ]
[ 24 Sep 2021, Friday ]

भाषा आयोगप्रति असन्तुष्टि जनैटी रानाथारू समुदायसे आन्दोलनके घोषणा

पहुरा | २५ भाद्र २०७८, शुक्रबार
भाषा आयोगप्रति असन्तुष्टि जनैटी रानाथारू समुदायसे आन्दोलनके घोषणा

पहुरा समाचारदाता
धनगढी, २५ भदौ ।
भाषा आयोगसे आपन ५औं वार्षिक प्रतिवेदन मार्फत सुदूरपश्चिमके सरकारी कामकाजी भाषामे रानाथारु भाषा यथा सिघ्र थपके माग करले बावै । भाषा आयोगसे संबिधानसे डेहल आधार ऐतिहासिक आधार नैहेरके केक्रो दबाबमे निर्णय करल कहटी उ निर्णय नैमन्ना कहटी विरोध कैटी आइल बटैं ।

विरोधके लाग रानाथारुके छाता संगठन नेपाल रानाथारु समाजके अगुवाइमे अन्दोलनके लाग रानाथारू भल्मन्सा, जन प्रतिनिधि, टमान संस्थाके पदाधिकारी तथा रानाथारु अगुवाहुक्रे सार्वजनिक भेला कैके अन्दोलनके लाग मोर्चा तयार परले बावै । भेलासे स्थानीय निकायसे केन्द्रीय तहसम दवाव डेना निर्णय करले बा ।

नेपाल रानाथारु समाजसे सुरु करल विरोध कार्यक्रममे रानाथारु संघर्ष समिति, राना कला एवं सस्कृति पर्वद्धन समाज, रानाथारु उत्थान समन्वय मञ्च, रानाकलाकार मञ्च, सहिद होरीलाल प्रतिष्ठान, रानाकला संस्कृति संरक्षण समिति तथा विकास मञ्च, रानाथारु युवा क्लब, रानाथारु कल्याण मञ्च, रानाथारु विद्यार्थी समाज, रानाथारु आदर्श क्लब, सागर ज्योति युवा क्लब, लगायतके टमान क्लबसे विरोधके समर्थन जनैले बाटै ।

भेलासे चरणवद्ध रुपमे आन्दोलन कैना निश्कर्ष निकरले बाटै । जेम्ने अन्तर्गत भदौ २४ गते मुख्यमन्त्री त्रिलोचन भट्ट ओ सभामुखहे ज्ञापन पत्र बुझैना ओ भदौ २८ गते सकारे ११ बजे धनगढी चौराहासे पार्कमोडसम र्याली कैके कोण सभा सहित बृहत प्रदर्शन कैना कार्यक्रम सार्वजनिक करल आन्दोलनके संयोजक कृपाराम राना बटैलै ।

आपन हक अधिकारके लाग जैसिन फेन आल्दोलन कैना तयार रहल ओ आवश्यकता अनुसार आन्दोलनके स्वरुप परिवर्तन कैटी लैजैना संयोजक राना बटैले बाटै ।

जनाअवजको टिप्पणीहरू