दलहुकनसे वार्ता प्रस्ताव अस्वीकार
पहुरा समाचारदाता
चौमाला, ३० भदौ । कैलालीकै गौरीगंगा नगरपालिकामे सोम्मारसे अनिश्चितकालिन तालाबन्दी आज टिसरा दिनफे यथावत् बा । नगरपालिकामे क्रियाशील पाँच राजनीति दलहुक्रे सयुक्त रुपमे लगाइल तालाबन्दी खोलेक लाग नगर प्रमुख भीमबहादुर देउवासे करल वार्ताके प्रस्ताव दलहुक्रे अस्वीकार करले बटै ।
नगर प्रमुख देउवासे काल्ह विज्ञप्ति जारी करके दलहुकनके वार्ता छलफलके प्रस्ताव करले रहिट । देउवा विज्ञप्तिमे नगरपालिकाके कार्यालयमे तालाबन्दीसे दैनिक प्रशासनिक कामकाज अबरुद्ध हुके सर्वसाधारण तथा सेवाग्राहीमे पुगे गैल असहजताके लाग खेद ब्यक्त करटी आन्दोलनरत राजनीतिक दलहुकनहे आन्दोलनके कार्यक्रम फिर्ता लेके तालाबन्दी खोल्न ओ वार्तामे अइना अपिल करले रहिट ।
नगर प्रमुखसे विज्ञप्तीमे प्रयोग करल भाषा शैलीप्रति दलहुक्रे आपत्ती जनैले बटै । दलहुक्रे संयुक्तरूपमे बारबार ध्यानाकर्षण सहित लिखित माग प्रस्तुत करलेसेफे सुनुवाइ नइहुइलपाछे बाध्य हुके तालाबन्दी करल जनैले बटै ।
भदौ २४ गते नगर प्रमुखसे अलटाल करके कौनो सहमति नइ करलपाछे भदौ २८ गतेसे कार्यपालिका कार्यालयमे अनिश्चितकालीन तालाबन्दी करल कहटी दलहुक्रे दैनिक कार्य संचालनमे अप्ठ्यारो हुइठ कहिके हम्रे महसुस करले बटी यथापी हमार माग पूरा कैना लिखित सहमति होए कना चाहल उल्लेख करले बटै ।
नगरपालिकामे हुइल भ्रष्टाचार अनियमितताके विषयमे आवाज उठाईबेर नगर प्रमुखसे खेद प्रकट कैना आपति जनैटी नगरप्रमुख जनता प्रति उत्तदायि नइहुइट कना प्रमाणित हुइल ओ दुसरा सम्बाद ओ छलफल वार्तासे समस्याके समाधान करे चाहल दलहुक्रे जारी करल संयुक्त विज्ञप्तिमे उल्लेख बा ।
नगर प्रमुखसे आन्दोलनप्रति खेद व्यक्त कैना ओ सार्वजनिक पदके दुरुपयोग करके अनियमितता भ्रष्टाचारके संरक्षणमे लिप्त रहल ओरसे नगरप्रमुखसे छलफल दलके प्रतिनिधिुक्रे बहिष्कार करले बटै ।
आन्दोलनहे गम्भीरतापूर्वक नइलेना ओ ध्यानाकर्षण हुई पर्नामे आपन गल्ती ढाकछोप कैना खेद व्यक्त करल ओरसे प्रमुख जिल्ला अधिकारीके उपस्थितिमे छलफल करके नगरपालिकामे हुइल अनियमितता भ्रष्टाचार ओ बेरुजुके छानबिन समिति गठन करके यथार्थ प्रतिवेदन सार्वजनिक करे पर्ना लिखित सहमति नइहुइटसम ताला नइखुल्न माओवादी केन्द्रके नेता देवीदत्त कडेल बटैलै ।
