मानव बेचबिखन तथा ओसारपसार नियन्त्रणमे जिप्रका कैलाली सर्वोत्कृष्ट

पहुरा समाचारदाता
धनगढी,३० भदौ । मानव बेचबिखन तथा ओसारपसार नियन्त्रणमे सर्वोत्कृष्ट कार्य करल ओरसे बुधके महिला, बालबालिका तथा जेष्ठ नागरिक मन्त्रालयसे एक कार्यक्रमके बिच जिल्ला प्रहरी कार्यालय कैलालीहे सम्मानित करले बा ।

पुरस्कार तथा सम्मान वितरण कार्यक्रमके वडका राष्ट्रिय योजना आयोगके माननीय सदस्य सलोनी प्रधान सिंह ओ मन्त्रालयके सचिव याम कुमारी खतिवडा (वास्कोटा) जिल्ला प्रहरी कार्यालय कैलालीके प्रमुख प्रहरी उपरीक्षक विश्व अधिकारीहे उ सम्मान प्रदान करलै ।

१५ औं मानब बेचबिखन तथा ओसारपसार नियन्त्रण राष्ट्रिय दिवसके अवसरमे २०७८ साल भदौ २० गते नेपाल सरकार महिला बालबालिका तथा जेष्ठ नागरिक मन्त्रालयसे मानब बेचबिखन तथा ओसारपसार नियन्त्रणमे जिल्ला प्रहरी कार्यालय कैलालीसे करल उल्लेखनीय कार्यके मूल्याकंन करटी जिल्ला प्रहरी कार्यालय कैलालीहे सर्वोत्कृष्ट जिल्ला घोषणा करल हो ।

जिल्ला प्रहरी कार्यालय कैलालीसे विगत एक बर्षमे मानब बेचबिखन तथा ओसार पसार करल कसुरमे १६ ठो घटनामे २६ जनहनहे पक्राउ करके मुद्दा चलाइल रहे । १६ ठो मुद्दामन्से ९ ठो मुद्दा मानब बेचबिखनके साथसाथे जबरजस्ती करणीमे समेत चलाइल रहे ।

ओस्टेक करके यी अबधिमे जिल्ला प्रहरी कार्यालय कैलालीसे सहयोगी संस्था तथा भारतीय प्रहरीके सहयोग ओ समन्वयमे १४ बर्षीय बालिकाहे भारतके बैंगलोरसे उद्दार करके पारिवारिक पुनर्मिलन कराके दोषी उपर मानव बेचबिखन तथा ओसार पसार ओ जबरजस्ती करणीमे मुद्दा चलाइल रहे ।

उहे अवधिमे जिल्ला प्रहरी कार्यालय कैलाली टमान संघ संस्थासंगके सहयोग ओ समन्वयमे ६ जाने महिला, २ बालक ओ ३ बालिका करके १२६ जनहनहे सिमा नाकासे उद्दार करके परिवारमे लौटाएइल रहे कलेसे ३ महिला, १७ बालक ओ १० बालिका करके ३० जनहनहे बेवारिसे तथा अलपत्र अवस्थामे फेला पारके निजहुकनके उद्दार तथा पारिवारिक पुर्नमिलन कराइल रहे ।

मानव बेचबिखन तथा ओसार पसार नियन्त्रणके लाग जिल्ला प्रहरी कार्यालय कैलालीसे समुदाय प्रहरी साझेदारी अन्तर्गत टमान जनचेतना मूलक कार्यक्रम कैनाके साथे शान्ति पुनरस्थापना गृह, माईती नेपाल जैसिन संघ संस्थासंग समन्वय तथा सहकार्य करके सीमा निगरानी, उद्दार, राहत, निशुल्क कानुनी परामर्श जाहेरी लेखन, औषधी उपचार, सुरक्षित आवास, मनोविमर्श, पारिवारिक पुनर्मिलन जैसिन सेवा प्रदान करटी आइल बा ।

यी सम्मान, हौसला ओ थप उर्जा प्रदान करलमे जिल्ला प्रहरी कार्यालय कैलालीके प्रमुख विश्व अधिकारी नेपाल सरकार महिला बालबालिका तथा जेष्ठ नागरिक मन्त्रालय सम्बन्धित संघ सस्थाहे धन्यबाद ओ आभार व्यक्त करले बटै ।