पत्रकार लक्की चौधरीहे ‘प्रेस काउन्सिल भाषागत पत्रकारिता पुरस्कार’
पहुरा समाचारदाता
काठमाडौं, ३१ भदौ । गोरखापत्र दैनिकके उपसम्पादक तथा हमार पहुरा डट कमके सञ्चालक पत्रकार लक्की चौधरी ‘प्रेस काउन्सिल भाषागत पत्रकारिता पुरस्कार २०७८’ से सम्मानित हुइना हुइल बाटै । प्रेस काउन्सिल नेपालके बुधके बैठल सञ्चालक समिति बैठकसे पत्रकार चौधरीहे उ पुरस्कार प्रदान कैना निर्णय करल हो ।
पुरस्कारके राशी नगद २० हजार रुपियाँ ओ सम्मानपत्र रहल काउन्सिल जनैले बा । काउन्सिलसे वरिष्ठ पत्रकारसहित अन्य पत्रकारहे समेत पुरस्कृत कैना निर्णय करले बा । आपन वार्षिकोत्सवके अवसर पारके कुँवार ६ गते एक कार्यक्रमबीच पुरस्कार हस्तान्तरण कैना कार्यक्रम रहल काउन्सिल जनैले बा ।
पुरस्कृत हुउइया वरिष्ठ पत्रकारमे भारतदत्त कोइराला (काठमाडौं)हे प्रेस काउन्सिल गोपालदास पत्रकारिता पुरस्कार २०७८, बद्रीविनोद खनाल प्रतीक (कास्की)हे प्रेस काउन्सिल सुरेन्द्रबहादुर बस्नेत पत्रकारिता पुरस्कार २०७८ प्रदान कैना निर्णय करले बा । पुरस्कारके राशी क्रमशः १ लाख ५१ हजार रुपियाँ ओ १ लाख १० हजार रुपियाँ रहल बा ।
पुरस्कृत हुइ लागल पत्रकार चौधरीके थारु भाषाके ६ ठो पुस्तक प्रकाशित बावै । चौधरी २०६१ मे ‘सहिदान’ गजलसंग्रह, २०६२ मे ‘तिहुवार’ संस्कृति परिचय, २०६३ मे ‘अन्तर्भाव’ गजल संग्रह, २०७० मे ‘मोर पहुरा’ निवन्ध संग्रह, २०७१ मे ‘नेन्धर’ कविता संग्रह ओ २०७२ मे ‘हँसौनी’ चुटकिला संग्रह प्रकाशन रहल बा ।
ओस्टके, कैलालीके धनगढीसे २०५९ चैतसे थारु भाषाके साप्ताहिक पत्रिका ‘पहुरा’ सञ्चालन करल चौधरी २०६३ वैशाख १ गतेसे ‘हमार पहुरा’ अर्धसाप्ताहिक प्रकाशन शुभारम्भ करल रहिट । जौन पत्रिका थारु भाषाके प्रथम अर्धसाप्ताहिक पत्रिका हो । उहेअनुसार थारु भाषाके प्रथम दैनिक पत्रिका ‘हमार पहुरा’ २०६४ सावन १ गतेसे प्रकाशित करल रहिट ।
थारु भाषा साहित्यमा निरन्तर योगदान कैटी आइल चौधरी हाल थारु कल्याणकारिणी सभा (थाकस) मातहत गठित थारु मानक भाषा मस्यौदा समितिके सचिवके जिम्मेवारीमे रहीके थारु भाषा मानकीकरणके काममे योगदान डेटी आइल बाटै ।
पत्रकारिता, समाजशास्त्र ओ राजनीतिशास्त्रमे स्नातकोत्तर पत्रकार चौधरी आधा दर्जनसे ढिउर पुरस्कार ओ सम्मानसे सम्मानित होसेकल बटाँ । पत्रकारिता ओ साहित्य डुनुमे निरन्तर कलम चलैटी आइल चौधरीके नयाँ कृति प्रकाशोन्मुख अवस्थामे रहल बा ।
