मानव बेचबिखन नियन्त्रण ओ कैलाली प्रहरी
मानव बेचबिखन ओ ओसारपसार नियन्त्रणमे सर्वोत्कृष्ट काम करल ओरसे महिला, बालबालिका ओ जेष्ठ नागरिक मन्त्रालयसे जिल्ला प्रहरी कार्यालय कैलालीहे सम्मानित कैगिल बा ।
१५ औं मानब बेचबिखन ओ ओसारपसार नियन्त्रण राष्ट्रिय दिवसके अवसरमे मन्त्रालयसे जिप्रका कैलालीहे सर्वोत्कृष्ट जिल्ला घोसना कैगिलक हो । स्मरन रहे, जिप्रका कैलालीसे विगत एक बरसमे मानब बेचबिखन ओ ओसार पसार करल कसुरमे १६ ठो घटनामे २६ जनहनहे पकरके मुद्दा चला गइल रहे ।
ओस्टक उहे अवधिमे जिप्रका कैलालीसे टमान संघ संस्थासंगके सहयोग ओ समन्वयमे ६ महिला, ५ लर्कापर्का कैके १२६ जनहनहे सिमा नाकासे उद्दार करके ओ ३० जनहनहे बेवारिसे ओ अलपत्र अवस्थामे फेला पारके परिवारमे पुनर्मिलन करा गइल रहे ।
मानब बेचबिखन ओ ओसारपसार नियन्त्रणमे मन्त्रालयसे जिप्रका कैलालीहे सर्वोत्कृष्ट जिल्ला घोसनाके समाचार निस्चय फेन फोहि लग्टिक बाट हो । मने हरेक सिक्काके डुइ पाटा रहठ कहेहस यकर डोसर फर्का बिल्टाके हेर्ना हो कलेसे मानब बेचबिखन ओ ओसारपसार ढेर हुइना जिल्ला मध्ये कैलाली फेन एकठो हो कना प्रमानिट हुइठ । पुलिस टोली नियन्त्रणमे सफलता पैना एक बाट हो, मने ऐसिन घटना बह्रटि जैना ठिक नैहो ।
ओसिन टे भारतसे खुला सिमा नाकाके कारन मानब बेचबिखन ओ ओसारपसार नियन्त्रण कर्ना कर्रा काम हो । परिवारमे बिग्रह आके, सवट्यक लर्कन मजा नैमान्के छोटहिम घर छोरे पर्ना अवस्था अइना, बनावटि भोज कैके बेच्ना जुगार लगैना जैसिन टमान मेरिक विकृति हमार समाजमे बावै ।
इहिसे भारि बिकराल समस्या अमेरिका लगायत देशमे अवैध ढंगले जाइक लग दलालके फन्डामे परके फेन टमान नेपाली डाडु भैया डिडिबहिन्यन चंगुलमे फँस्टि बाटैं । अन्जानमे बेचबिखन हुइना स्वाभाविक बाट हो । मने जान जानके दलालके मिठ सपनामे भुलाके, बहुट खर्च कैके ज्यान जोखिममे ढैके देश बाहेर जाइक छट्पटैना युवालोगन सम्झे पर्ना बा कि कहुँ मै नै निक्रे सेक्ना जालेम टे नै परम् ?
ओहेसे मानब बेचबिखन ओ ओसारपसार नियन्त्रणमे नागरिक स्वयम् सचेत हुइ । नागरिक फेन विना बर्दिक सिपाहि हुइट कना ना भुलाइ । परिवारमे असिन बाताबरन ना बनाइ कि लर्कापर्कन घर छोरके भग्नास मन लागे ।
