गोदावरी पत्रकार मञ्चके पहिल अधिवेशन
पहुरा समाचारदाता
धनगढी, ०१ कुँवार । कैलालीके गोदावरी नगरपालिका अत्तरियामे रहल गोदावारी पत्रकार मञ्चके प्रथम अधिवेशन निम्जल बा ।
बिफेक रोज गोदावरी नगरपालिका नगरप्रमुख हरिसिंह साउँदके प्रमुख आथित्यतामे अधिवेशन हुइल हो ।
नगरप्रमुख साउँद पत्रकारिता विकृति, विसंगति बाहेर नन्ना हुइल ओरसे समाजमे यकरमहत्वपूर्ण भूमिका रहल बटैलैं । उहाँ गोदावरीमे रहल पत्रकारहुक्रे एक ठाउँमे आइ परना आवश्यक रहल बटैलैं । ‘सक्कु पत्रकारहुक्रे एक ठाउँमे अइलेसे हम्रिहिनहे फेन काम करना सहजिल हुइट,’ उहाँ कलैं ।
कार्यक्रममे सुदूरपश्चिम प्रदेश पत्रकार महासंघके अध्यक्ष योगेश रावल पत्रकारहक हितके लाग महासंघ जब फेन आघे रहल बटैलैं । कैलाली पत्रकार महासंघ अध्यक्ष हिमालय जोशी महासंघ पत्रकारहुकनके हकहितके लाग जबफेन तयार रहल बटैलैं ।
अस्टेक, कार्यक्रममे पत्रकार महासंघके केन्द्रिय सदस्य भरत शाह समस्या परल पत्रकारहुकनहे स्थानीय सरकारसे फेन सहयोग करेपरना बटैलैं ।
कार्यक्रममे काँग्रेसके युवा नेता क्षतिज भण्डारी पत्रकारहुकनहे कोरोना जोखिमसे बचेक लाग मञ्चहे २१ हजार बराबरके स्वास्थ्य सामग्री सहयोग डेलैं । मास्क, सेनिटाईजर लगायतके सामग्री मञ्चके अध्यक्ष हेमराज भट्टराई हस्तान्तरण करल हो ।
कार्यक्रममे वरिष्ठ पत्रकार मनमोहन स्वाँर, दिलबहादुर सत्याल, कैलाली पत्रकार महासंघके पूर्व अध्यक्ष जगत साउँद, पत्रकार गोविन्द रोस्यारा लगायत शुभकामना मन्तव्य व्यक्त करले रहैं ।
