संसद खुलैना सत्तापक्ष भूमिका खेले परल: रावल
पहुरा समाचारदाता
अछाम, १ कुवाँर । नेकपा एमालेके उपाध्यक्ष डाक्टर भीम रावल संसदके अवरोध खुलैना सत्तापक्षसे कौनो पहल नइकरल आरोप लगैलै ।
वर्तमान सरकार तथा सात्ता साझेदारहुक्रे संसदके अवरोध समाधान कैना ओरसे पेलके आघे बढे खोजल कहटी नेता रावल उचित समाधानके लाग सरकारके नेतृत्वकर्तासे कौनो पहल नइकरल बटैलै ।
प्रेस चौतारी अछामसे सदरमुकाम मंगलसैनमे करल पत्रकार सम्मेलन कार्यक्रममे एमाले नेता रावल नेपालके संविधान जारी हुइल यहोर देशमे स्थिरता हुई नइसेकल कहटी नेपाली जनता निर्वाचित करल प्रतिनिधिके सार्वभौम थलो संसद रहल ओ यिहीसे अपन उपयोगिताहे सिद्ध करे पर्ना बटैलै ।
नेता रावल जनताप्रतिके उदासिनताके कारण अब्बे बजेट खर्च करे नइपैना अवस्था सिर्जना हुइल बटैलै । नेपालके ईतिहासमे यी पहिल चो समस्या आइल कहटी यैसिन हुइलेसेफे सरकारके नेतृत्व करटी रहल हुकनहे कौनो चिन्ता नइरहल दाबी करलै । २ महिना बिटलेसेफे मन्त्रीमण्डल पूर्णता नइपैना दुसर बिडम्बना रहल उहाँके कहाई बा ।
राजनीतिक दल विभाजित हुइना नइहुइना कहटी पूर्व उपप्रधान, रक्षा तथा गृहमन्त्री रहल नेता डाक्टर रावल नेपालके संविधान जारी करेबेर बहुट राजनीतिक दल विभाजनके लाग केन्द्रीय कमिटि ओ संसदमे ४० प्रतिशत हुई पर्ना व्यवस्था करल स्मरण करैलै ।
