अर्थमन्त्री तामाङ ओ राज्यमन्त्री बोहरासे सपथ ग्रहण

पहुरा समाचारदाता
धनगढी, १ कुँवार । सुदूरपश्चिम प्रदेशमे आर्थिक मामिला मन्त्रीमे तारालामा तामाङ नियुक्त हुइल बाटै । नेकपा (एकीकृत समाजवादी)के ओरसे तामाङ आर्थिक मामिला मन्त्रीमे नियुक्त हुइल हुइट । ओस्टके मुख्यमन्त्री त्रिलोचन भट्ट अर्थ राज्यमन्त्रीमे नेकपा (एकीकृत समाजवादी)के माया तामाङ बोहराहे नियुक्त करले बाटै ।

नवनियुक्त मन्त्री ओ राज्यमन्त्री शुकके शपथ लेले बाटै । मन्त्री तामाङहे प्रदेश प्रमुख गंगाप्रसाद यादव ओ राज्यमन्त्री बोहराहे मुख्यमन्त्री भट्ट सपथ ग्रहण कराइल हुइट । भदौ २२ गते अर्थमन्त्री प्रकाशबहादुर शाह ओ अर्थ राज्यमन्त्री अर्चना गहतराज पदसे राजीनामे डेहलपाछे पद रिक्त हुइल रहे ।

तामाङ एमालेके पुर्व प्रमुख सचेतक हुइट कलेसे माया तामाङ बोहरा इहीसे आघे नेकपा विवाद हुइबर ओली पक्षमे रहिट । उहाँ २१ भदौमे एकीकृत समाजवादीके पक्षमे सनाखत करलपाछे राज्यमन्त्रीमे नियुक्त करल हो । माओवादी नेतृत्वके सरकारमे एकीकृत समाजवादी फेन सहभागी रहल बा । एकीकृत समाजवादी प्रदेश सभामे बरवार दल हो ।

प्रदेश सभामे एकीकृत समाजवादीके १४, माओवादी केन्द्रके १३, नेपाली काँग्रेसके १२, सभामुखसहित एमालेके ११, जसपा ओ लोसपाके एक÷एक सांसद रहल बाटै ।