विद्युतीय धरापमे परके ३ जानेक मृत्यु
बर्दिया, २ कुवाँर । गैल रात धान खेतुवामे बँदेल लगायतके जंगली जनावर भगैना बिछाइल विद्युतीय धरापमे (पासो) परके एक्के परिवारके ३ जानेक मृत्यु हुइल बा ।
ठाकुरबाबा नगरपालिका ३ गोदाना गाउँके ३२ वर्षीय बालकृष्ण थारू, उहाँक गोसिनीया २९ वर्षीया सुनिता ओ बालकृष्णके भाउजी ४३ वर्षीया बेलमतीके गैल रात १२ बजेके समयमे विद्युतीय धरापमे परके मृत्यु हुइल वर्दिया जिल्ला प्रहरी प्रमुख एसपी ईश्वर कार्की जानकारी डेलै ।
‘हम्रहिनहे रातके १ बजेओर पत्ता हुइल हो’, एसपी कार्की कहलै, ‘धानखेतमे करेन्ट प्रवाह करल आरोपमे मृतक परिवारके छिमेकी ८२ वर्षीय राजबहादुर शाहीहे हम्रे नियन्त्रणमे लेले बटी ।’
घटनाबारे थप अनुसन्धान हुइटी रहल इलाका प्रहरी कार्यालय भुरिगाउँके प्रहरी निरीक्षक कविराज रोकाय बटैलै ।
स्थानीयके अनुसार धानबालीमे जंगली हात्ती, बँदेललगायतके वन्यजन्तुसे क्षति पुगाई लागल ओरसे करेन्ट प्रवाह करेबेर करेन्ट लागके यी आघे दुई ठो जंगली हात्ती ओ एक जाने युवाके ज्यान गैल रहे । घटनाके ईलाका प्रहरी कार्यालय भुरिगाउँ प्रारम्भिक अनुसन्धान करटी रहल जनाइल बा ।
