बुडिक् हत्या करुइया सार्वजनिक
बझाङ, २ कुँवार । बझाङमे आपन बुडीक हत्याके आरोपीहे जिल्ला प्रहरी कार्यालय बझाङ पत्रकार सम्मेलन मार्फत सार्वजनिक करले बा ।
बुडीक हत्या करल आरोपमे बिफेक रोज पक्राउ परल दुर्गाथली गाँउपालिका वडा नं. ५ के २३ बर्षिया सुवास जप्रेलहे प्रहरी सार्वजनिक करल हो ।
सुवास जप्रेल भदौ २७ गते सकारे ८/९ बजेके समयमे ढरियार हतियार हँसिया प्रयोग कैके ८५ बर्षिया अपने बुडी रिखी देवी जप्रेलके हत्या करल रहिट । अक्के घरमे बैठ्टी आइल सुवास बुडीक हत्या कैके अंगनाक लग्गे शव गारल अवस्थामे ३० गते नै प्रहरी शव फेला पारल रहे ।
सुवास आपन बुडीक कानमे लगाइल २ थान सुनके मुन्द्रा ओ नाकमे लगाइल १ थान सुनके मुन्द्रीके लोभसे हत्या करल स्वीकार करल प्रहरी नायब उपरिक्षक रुपक खड्का जानकारी डेलै ।
सुनके लोभसे आपन बुडीक हत्या करल प्रारम्भिक अनुसन्धानसे खुल्ना आइल प्रहरी नायब उपरिक्षक खड्काके कहाइ रहल बा । घटना २७ गते सकारे घटल ओ दिनके उक्त गहना विक्री कैके फेनसे साँझ ६/७ बजेके समयमे घटना स्थलमे पुगके भिट्टर रहल शवहे तानके घरके अँगनक आघे रहल खटहामे गारल जप्रेल स्वीकार करले बाटै । घटनाबारे थप अनुसन्धान हुइटी रहल समेत डिएसपी खड्का बटैलै ।
