संविधानः केक्रो लग करिया, केक्रो लग गोहर

थरुहट/थारुवान राष्ट्रिय मोर्चा कैलालीसे संविधान दिवसके दिन कुँवार ३ गतेहे करिया दिनके रूपमे मनैटि बा । करिया दिनके रुपमे मनैना कार्यक्रमके संयोजक माधव चौधरीके अन्सार कैलाली जिल्लाके टमान ठाउँमे संविधानके धारा २७४ ओ अनुसूची ४ हे जराके विरोध कै जैटि बा ।

२०७२ असोज ३ गते ७ प्रदेशके संरचनामे ‘नेपालके संविधान २०७२’ जारी हुइल रहे । मने थरुहट/थारुवान मोर्चासे कैलाली–कञ्चनपुरसहित पश्चिउँ तराईहे थरुहट राज्य बनाई पर्ना लगायतके माग जारि बा । मोर्चासे संविधान जारी हुइना आघेसे उठैटि आइल माग संविधानमे नइ समेटट् सम मोर्चा संविधान जारी हुइल दिनहे करिया दिनके रूपमे मनुइया बा ।

ओहोर जनता समाजवादी पार्टी (जसपा) से फुटल पार्टी लोकतान्त्रिक समाजवादी पार्टी (लोसपा) फेन संविधान दिवसहे करिया दिनके रुपमे मनुइया बा । जसपा भर इ दिनहे ना मनैना, ना बहिष्कार कर्ना तटस्थ रुपमे रना जनैले बा ।

मधेशवादी दल अपने सत्तामे रलेसे संविधान दिवसहे भव्यताके साथ मनैना, सत्ताके भरांगि उच्यइना क्रममे रलेसे तटस्थ रुपमे रना ओ सत्ता बाहेर रलेसे करिया दिनके रुपमे मनैना नौटंकि कैटि आइल बाटैं । मने थरुहट÷थारुवान राष्ट्रिय मोर्चा सदाबहार रुपमे संविधान दिवसके दिन कुँवार ३ गतेहे करिया दिनके रूपमे लग्ढार मनैटि आइल बा । पटा नैहो, इ दिनहे करिया दिनके रुपमे मनैना थारुन्के कै पुस्टा बिटठ् ?

थारु कहिया सत्ताके भरांगि उच्यइहिं ? कहिया अपन मनमाफिक संविधानके छटरि टरे बैठे पैंहि ? इ सोंचनिय बिसय बा । एक समय थरुहट तराई पार्टी नेपाल गठन हुइल टे थारु समुदायके हक अधिकार उठैना अपनत्व रहल पार्टी आइल कना लागल रहे । थरुहट तराई पार्टी नेपाल विजयकुमार गच्छदार नेतृत्वके फोरम लोकतान्त्रिकमे विलय हुइल पाछे फेन इहे कहिके चिट बुझा गइल रहे कि चलो उ पार्टीके अग्वा मुँरि थारु जो बाटैं । मने पाछे फोरम लोकतान्त्रिक कांग्रेसमे विलय हुइल पाछे जौन मेरिक थारु नेतृत्व आइटेहे, ओहो ओढिया गैल ।

पश्चिउँ थरुहटमे जसपाहस क्षेत्रिय पार्टीके अभिनसम जरुरट बा, जे थारु लगायट उट्पिडिटन्के आवाज उठाए । यकर लग थारुन्के परम्परागट प्रठा बरघर प्रनालिहे संस्थागट कर्ना जरुरि बा, जिहिसे थारुन्के बरघर ऐन मार्फट अपने संविधान लागु हो सेके । आबक् लग टे संविधान केक्रो लग गोहर बा, मने थारुन्के लग टे करिया जो बा ।