संविधानके पूर्ण पालना ओ कार्यान्वयनमे प्रदेश सरकार प्रतिबद्ध बाः मन्त्री चौधरी
पहुरा समाचारदाता
धनगढी, ३ कुँवार । सुदूरपश्चिम प्रदेशके भौतिक पूर्वाधार विकास राज्यमन्त्री चुनकुमारी चौधरी नेपाली जनताके लम्मा संघर्ष ओ बलिदानसे प्राप्त संविधानके अक्षरशःपालनामे राजनीतिक नेतृत्व, सरकार प्रमुख ओ नेपाली जनता इमान्दार हुइ पर्ना बटैले बाटी ।
संविधान दिवसके अवसरमे उहाँ लम्मा राजनीतिक संघर्षसे प्राप्त संविधानसे सामन्ती, निरंकुश, केन्दिकृत, राज्यव्यवस्थासे सिर्जित सक्कु मेरके असमानता, विभेद ओ उत्पीडनके अन्त्य कैटी सहअस्तित्व, न्याय ओ समानताके माध्यमसे नेपाली समाजहे समृद्धिके मार्गमे आघे बह्रैना लक्ष्य लेहल उल्लेख करली ।
जननिर्वाचित संविधानसभासे निर्मित संघीय लोकतान्त्रिक गणतन्त्र नेपालके संविधान २०७२ जारी हुइल सातौँ बरस प्रवेशके अवसरमे स्वदेश तथा विदेशमे रहल सक्कु नेपाली दादाभैया, दिदीबहिनीयाहुक्रनहे मन्त्री चौधरी शुभकामना व्यक्त करले बाटी । यकर साथे उहाँ संघीय लोकतान्त्रिक गणतन्त्र नेपाल स्थापनार्थ अमूल्य जीवन गुमाइल ज्ञातअज्ञात सहिदप्रति भावपूर्ण श्रद्धाञ्जली अर्पण करले बाटी ।
साथे मन्त्री चौधरी सुदूरपश्चिम प्रदेश सरकार नेपालके संविधानके पूर्ण पालना ओ कार्यान्वयनमे प्रतिबद्ध रहल बटैले बाटी । उहाँ सक्कु खालके असमानता, वञ्चनाके कानुन ओ नीतिसे सम्बोधन कैटी लोककल्याणकारी राज्यके अनुभूति करैना दायित्व फेन प्रदेश सरकारके रहल बटैले बाटी ।
नेपालके संविधानसे सक्कु नेपालीहुक्रनहे नेपाली हुइनामे गौरव अनुभूत कराइ सेके, राष्ट्र, राष्ट्रियता ओ बृहत राष्ट्रिय एकता, सामाजिक सद्भावहे मजबुद बनैना नेपालके संविधान थप प्रेरक बने कहटी उहाँ संविधान दिवस २०७८ के सक्कु जनहनहे हार्दिक शुभकामना समेत व्यक्त करले बाटी ।
