बालकृष्ण थारू परिवारके मौट ओ न्याय
धानेम् बँडेल लगायटके जंगली जनावर भगैना बिछाइल विद्युतीय फाँडामे परके एक्के परिवारके ३ जानेक ज्यान गइल बा । बर्दिया ठाकुरबाबा नगरपालिका–३ गोदाना गाउँके ३२ बर्सक् बालकृष्ण थारू, उहाँक गोसिन्या २९ बर्सक् सुनिता ओ बालकृष्णके भौजि ४३ बर्सक् बेलमतीके विद्युतीय फाँडामे बाझके ज्यान गैलक हो ।
ओसिन टे धानेम् करेन्ट प्रवाह करल आरोपमे मृतक परिवारके छिमेकी ८२ बर्सक् राजबहादुर शाहीहे पुलिस पकरले बाटैं । शाहीहे कार्वाही हुइ फे सेकठ या घटना भविटब्य हो कहिके सामसुम फेन पारे सेक्जाइठ ।
इहिसे पहिले करेन्ट प्रवाह करेबेर करेन्ट लागके २ ठो जंगली हाँठि ओ एक युवाके ज्यान गैल रहे । निकुन्ज वरपरके गँवल्यन अपन बालिनालिके संरक्षणके लग मेरमेरिक उपाय अपनैना स्वभाविक हो । मने जिवजान्वरके लग लगाइल फाँडामे मनैन्के ज्यान जैना उचिट नाइ हो । छिमेकी कोनो फाँडा लगैलेसे अपन डोसर छिमेकीहे समयमे जानकारि कराइक चाहि । जानकारिके अभावमे बालकृष्ण थारूके पुरे परिवार सखाप हो गैल ।
जउइयनके ज्यान फिर्टा लाने नैसेक्जाइठ । बालकृष्ण थारूके परिवारहे कसिक न्याय डिहाइ सेक्जाइठ, इ अहम् सवाल हो । निकुन्जके संरक्षक सेनाके ओरसे घटना फासफुस ना होए, यकर लग स्थानीय जनता, गँवल्यन, थारु संघसंस्था आवाज उठाइक चाहि ।
सामान्य घटनामे फेन मृतक परिवार १० लाख क्षतिपूर्ति पैठाँ । यहाँ टे अक्के परिवारके ३/३ जन्हनके ज्यान गैल बा । ओहेसे न्यायके पलरा ना डग्मगाए । बालकृष्ण थारूके परिवार उचिट न्याय पाए ।
