भारतीय तस्कर समूहके आक्रमणसे ३ सशस्त्र प्रहरी घाहिल
पहुरा समाचारदाता
धनगढी, ५ कुवाँर । कञ्चनपुरमे भारतीय तस्कर समूहके आक्रमणसे नेपालके तीन जाने सशस्त्र प्रहरी घाहिल हुइल बाटै ।
सोम्मार साँझ करिब ८ बजेके समयमे दोधाराचाँदनी नगरपालिका–८ के कञ्जभोज लग्गे नेपाल–भारत सीमा क्षेत्रमे गस्तीमे खटल सशस्त्र प्रहरीके टोलीहे भारतीय तस्करके समूहसे आक्रमण करल हो ।
आक्रमणसे सशस्त्र प्रहरीके बीओपी कञ्जभोजमे कार्यरत तीन जाने जवान समान्य घाहिल हुइल सशस्त्र प्रहरी बल नेपाल नम्बर ३५ नम्बर गण शैलेश्वरी जनैले बा । घाहिल हुइल जवानहुक्रनके दोधाराचाँदनीस्थित स्थानीय स्वास्थ्य चौकीमे उपचार हुइल बा ।
नेपाल ओर टमान समान तस्करी हुइटी रहल अवस्थामे सशस्त्र प्रहरीके गस्ती टोलीसँग भेट होके एक्कासी उहाँहुक्रे ढुङ्गामुढा करल सशस्त्र प्रहरी बल नेपाल नम्बर ३५ गण शैलेश्वरीके प्रमुख सशस्त्र प्रहरी उपरीक्षक (एसपी) वीरेन्द्र ऐर जानकारी डेलै ।
तस्करके समूहहे नियन्त्रणमे लेना प्रयास करलेसे फेन ३०/४० मिटर लग्गे भारतीय भूमि रहल ओरसे उहाँहुक्रे भग्ना सफल हुइल एसपी ऐर बटैलै ।‘हम्रे नियन्त्रणमे लेना कोसिस करेबर उहाँहुक्रे भागके भारतीय भूमिमे प्रवेश करलपाछे एसएसबी ओ भारतीय प्रहरीहे जानकारी कराइल रही,’ ऐर कहलै, ‘तत्काल एसएसबी ओ भारतीय प्रहरी घटनास्थल पुगल रहे । उहाँहुक्रे उक्त समूहके पहिचान कैके कारवाही कैना प्रतिबद्धता जनैले बाटै ।’
ओहकान अनुसार भारतीय तस्करके समूहके पहिचान होसेकल बा ओ आज मंगरके तस्करके समूहहे नियन्त्रणमे लेके कानून बमोजिम कारवाही कैना आश्वासन भारतीय पक्षसे डेले बा ।
नेपाल–भारत सीमा क्षेत्रमे घरी घरी गस्तीमे खटल सुरक्षाकर्मीउपर तस्करके समूहसे आक्रमण हुइटी आइल बा । पर्याप्त पूर्वतयारीके अभाव ओ डुनु देशके सुरक्षा अधिकारीबीचके कमजोर समन्वयके कारण अइसीन घटना दोहरटी आइल अधिकारी बटैले बाटै ।
