फूलवारी बहुमुखी क्याम्पस विकासके लाग प्रतिवद्ध बाटी
पहुरा समाचारदाता
धनगढी, ५ कुँवार । धनगढी उपमहानगरपालिका वडा नम्बर १९ अन्तर्गतके फूलवारी बहुमुखी क्याम्पसके विकासके लाग अपनेहुक्रे प्रतिवद्ध रहल एक कार्यक्रमके वक्ताहुक्रे बटैले बाटै ।
सोम्मारके फूलवारीमे हुइल क्याम्पसके उन्नति प्रगति ओ विकास सम्बन्धी अन्तरक्रिया कार्यक्रममे वक्ताहुक्रे क्याम्पसके सर्वाङ्गीन विकासके लाग अपनेहुक्रे प्रतिवद्ध रहल बटाइल हुइट ।
सुदूरपश्चिम प्रदेश सभाके सभामुख अर्जुनबहादुर थापा सामुदायिक क्याम्पसके विकासके लाग पअने लागल ओ फूलवारी क्याम्पसहे सहयोग कैना बटैलै । विधायन तथा प्रदेश मामिला समितिके सभापति नेपालु चौधरी स्थापना कालसे नै क्याम्पसके विकासमे सहयोग कैटी आइल ओ आगमी दिनमे समेत थप सहयोग कैना उहाँ बटैलै ।
प्रदेश सभा सदस्य सुशीला बुढाथोकी फेन अपने क्याम्पसके समग्र विकासके लाग सहयोग कैना बटैली । ओस्टके सुन्दर सुदूरपश्चिमके अभियन्ता गोपाल हमाल फेन क्याम्पसके समग्र विकासके लाग अपने आर्थिक, नैतिक लगायतके सक्कु सहयोग कैना प्रतिवद्धता जनाइल रहिट । क्याम्पस विकासके लाग धिरेन्द्रबहादुर सिंहके संयोजकत्वमे ३३ सदस्यीय क्याम्पस सहयोग उपसमिति गठन हुइल बा ।
कार्यक्रम क्याम्पस सञ्चालक समितिके अध्यक्ष रमेशकुमार बस्नेतके अध्यक्षतामे हुइल रहे ।
