धानके समर्थन मूल्य तोकगिल
पहुरा समाचारदाता
धनगढीं, ६ कुवाँर । चालु आर्थिक वर्षके लाग सरकारसे धानके न्यूनतम सर्मथन मूल्य क्विन्टलमे १७ रुप्या बढाके तोक्ले बा ।
भदौ २९ गते बैठल मन्त्रिपरिषद् बैठकसे आर्थिक वर्ष ०७८/७९ के लाग मोटा ओ मध्यम मेरके धानके न्यूनतम सर्मथन मूल्य तोकल कृषि तथा पशुपन्छी विकास मन्त्रालय जनैले बा ।
चालु आर्थिक वर्षके लाग मोटा धानके प्रति क्विन्टल मूल्य दुई हजार ७५२ ओ मध्यम मेरके धानके मूल्य दुई हजार ९०२ रुप्या तोकल मन्त्रालयके सहसचिव एवं प्रवक्ता प्रकाश सञ्जेल बटैलै ।
यी वर्ष तोकल धानके सर्मथन मूल्य गैल वर्षसे प्रति क्विन्टल १७ रुप्यासे ढेर रहल प्रवक्ता सञ्जेल जानकारी डेलै । गैल वर्ष असारे धान लगैना आघे सरकार धानके सर्मथन मूल्य तोकल रहे ।
उ आर्थिक वर्षमे किसानसे मोटा धान प्रतिक्विन्टल २ हजार ७ सय ३५ ओ मध्यम धानके मूल्य २ हजार ८ सय ८५ रुप्या तोकल रहे ।
