विद्यालयस्तरीय चित्रकला प्रतियोगिता
पहुरा समाचारदाता
कञ्चनपुर, ८ कुवाँर । अनौपचारिक क्षेत्र सेवा केन्द्र (इन्सेक) सुदूपश्चिम प्रदेश कार्यालय धनगढीसे कञ्चनपुर जिल्लामे सञ्चालित स्थानीय समुदायहे सचेत परटी जिम्मेवार निकायहे जवाफदेही बनैना विद्यालय स्तरीय चित्रकला तथा निबन्ध लेखन प्रतियोगिता करले बा ।
कञ्चनपुर कृष्णपुर नगरपालिकाके कृष्ण माध्यमिक विद्यालयमे गठित बाल अधिकार चेतना समुहसे इन्सेक धनगढीके सहयोगमे उ प्रतियोगिता करले रहे । प्रतियोगितामे कक्षा छ से आठसस अध्ययनरत २५ जाने बालबालिकाहुक्रे प्रतिस्पर्धा करले रहिट ।
चित्रकला प्रतियोगिता अन्तर्गत बालबालिकाहुकनहे अपन विद्यालयके चित्र बनाई लगाइल रहे । तयार पारल चित्र शिक्षकहुकनके मूल्यांकन समिति मार्फत मूल्यांकन करके पहिलमे कक्षा ७ के छात्रा रुबिना बोहरा, दुसरमे कक्षा ८ के छात्रा लक्ष्मी बोहरा ओ टिसरामे कक्षा ८ के छात्रा रेखा थापा हुइल बटै । उहाँहुकन विद्यालयके प्रधानाध्यापक गोपाल दत्त बढु मार्फत पुरस्कार वितरण करल रहे ।
ओस्टेक करके कोरोना महामारीसे शिक्षा क्षेत्रमे पारल प्रभाव विषयक निबन्ध लेखन प्रतियोगिताके कक्षा नौ ओ दशमे अध्ययनरत १९जाने प्रतिस्पर्धा करल रहिट । २०० शब्द नइघटाके निबन्ध लेखे लगाइल रहे । मूल्यांकन समितिसे प्रकाशित नतिजाअनुसार कक्षा नौ के छात्र सन्तोश बुढा पहिल, कक्षा दशके छात्र नवराज जोशी दुसरा ओ कक्षा दशके छात्र भुवनसिंह खत्री तृतीय स्थान हासिल करले रहिट ।
कार्यक्रमे बोल्टी विद्यालयका प्रधानाध्यापक गोपालदत्त बडु अनौपचारिक क्षेत्र सेवा केन्द्र (इन्सेक)से बिगत नम्मा समयसे अपन बिद्यालयमे बालबालिकाहुकनके चौतर्फी विकासका लाग टमान अतिरिक्त क्रियाकलापके आयोजना कैना सहयोग करल ओरसे संस्थाहे घन्यबाद ज्ञापन करटी अइना दिनमे यैसिन खाले अतिरिक्त क्रियाकलापके आयोजना कैना सहयोग करडेना आग्रह करल रहिट ।
बाल अधिकार चेतना समुहके संरक्षक शिक्षक लोकमणि चौधरी बालअधिकार चेतना समूह मार्फत विद्यालयमे टमान अतिरिक्त क्रियाकलाप, सरसफाई कार्यक्रम संचालन हुइटी आइल ओरसे यैसिन क्रियाकलापके निरन्तरताके लाग इन्सेकसंग आग्रह करलै ।
