जबरजस्ती करणी अभियोगमे पक्राउ
पहुरा समाचारदाता
धनगढी,८ कुवाँर । १३ बालिकाहे जबरजस्ती करणी करल अभियोगमे २ जनहनहे बिफेक साँझ प्रहरी पक्राउ करले बा ।
पक्राउ परुइयामे पर्शुराम नगरपालिका–१० बैठना २३ वर्षीय राम सिंह ठगुन्ना ओ दार्चुला नौगाड गाउँपालिका–५ घर रहल २७ वर्षीय जगदिश धामी रहल बटै । उ किशोरीहे दुई जाने अपरिचित लउण्डाहुक्रे कुवाँर ५ गते बलत्कार करके भागल कना खबर प्राप्त हुइटीकी ईलाका प्रहरी कार्यालय जोगबुढासे खटल प्रहरी घटनामे संलग्न दुनु जनहनहे नियन्त्रणमे लेहल हो ।
ओस्टेक बर्दिया जिल्ला १६ वर्षीया किशोरीहे जबरजस्ती करणी करल अभियोगमे मधुवन नागरपालिका–१ कुसुम्बा बैठना २४ वर्षीय सुरेश मगरहे बिफेक साँझ प्रहरी पक्राउ करले बा ।
मगरसे गैल सावन २४ गतेसे कुवाँर ६ गतेसम उ किशोरीहे भोज करम कहिके ललाई फकाई अपने घरेम लैजाके जबरजस्ती करणी करके कुटपिट तथा धाकधम्की समेत डेना करल कना खबर प्राप्त हुइटीकी ईलाका प्रहरी कार्यालय ढोढरीसे खटल प्रहरी उहाँहे पक्राउ करल हो ।
ओस्टेक भक्तपुर जिल्लाके १३ वर्षीया किशोरीहे जबरजस्ती करणी करल अभियोगमे सिन्धुली सुनकोशी गाउँपालिका–४ बैठना २५ वर्षीय मिठाराम धिमालहे बुधके प्रहरी पक्राउ करले बा ।
धिमाल गैल सावन १५ गते सकारे भक्तपुर मध्यपुर ठिमीस्थित गेष्ट हाउसमे उ किशोरीहे जबरजस्ती करणी करके फरार हुइल कना खबर प्राप्त हुइटी साथ महानगरीय प्रहरी परिसर भक्तपुरसे खटल प्रहरी महोत्तरी बर्दिबास नगरपालिका–१ मे लुकीछिपी बैठल अवस्थामे फेला उहाँहे पक्राउ करल हो । यी सम्बन्धमे प्रहरी थप अनुसन्धान करटी रहल बा ।
