ओलीहे सिंहासनमे बैठैना भारी भुलः भट्ट
पहुरा समाचारदाता
मसुरिया, ८ कुवाँर । माओवादी केन्द्र सुदुरपश्चिम प्रदेश इन्चार्ज खगराज भट्ट केपी ओलीहे गणतन्त्रके सिहंसानमे बठैना गम्भीर भुल रहल बटैले बटै ।
माओवादी केन्द्र नगरकमिटी गौरीगंगासे मसुरियामे आयोजना करल विशेष कार्यकर्ता भेला तथा प्रशिक्षण कार्यक्रमहे सम्बोधन करटी प्रदेश इन्चार्ज भट्ट गणतन्त्रप्रति कौनो लगाव नइहुइल ओलीप्रति लक्षित करटी कहलै ग्राउन्डमे जहाज बा मने चलैना ट्रयाक्टरके चालकहे लगाइल जस्टे प्रचण्ड ओ माधवहुक्रे गणतन्त्र संघियताप्रति कौनो योगदान नइहुइल ओलीहे प्रधानमन्त्री बनैना गम्भीर भुल रहल बटैले रहिट ।
राजाके गुणगान गैना अवस्थासे जनयुद्धके बलमे गणतन्त्र नन्ना माओवादीके प्रमुख योजना सफल हुइल बटैटी भट्ट सक्कु जाति वर्ग समुदायके हक अधिकार संविधानमे सुरक्षित कैना माओवादीके निति परिवर्तनहे देशसे स्विकारल उल्लेख करटी जेकर नीति ओक्रे नेतृत्व स्थापित कैना सक्कु नेता कार्यकर्ता जनतामाझ जाई पर्ना नितान्त आवश्यक रहलमे जोड डेलै ।
माओवादीसे उठान करल मुद्दा सहि रहल ओरसे राज्यके स्थानीय तहसे संघिय ओहदा ओ पदमे महिला, जनजाति, दलित उत्पीडीत वर्ग समुदायके अनिवार्य सहभागिता ओ परिवर्तनहे संविधानमे सुनिश्चित करल विषय जनता बुझैना आवश्यक रहल बटैले रहिट ।
लेखराज भट्टप्रति लक्षित करटी विगतमे सामन्ती पृष्ठभूमिके विरुद्ध लागल नेता सम्पन्न रहटी रहटी जंगल क्षेत्रके ५ विगाहा जमिन अपने नाउमे दर्ता करके अपन असली चरित्र डेखाइल बटैले बटै ।
नगर इन्चार्ज पवनकुमार बोगटीके अध्यक्षतामे हुइल प्रशिक्षण तथा कार्यकर्ता भेलामे जिल्ला इन्चार्ज रुपा चौधरी, संविधान सभा सदस्य हरि ज्ञावाली (अखण्ड), संविधान सभा सदस्य हरि श्रीपाइली, माओवादी केन्द्र सुदुरपश्चिम प्रदेश सभा संसदीय दलके प्रमुख सचेतक अकल रावल लगायत मन्तव्य व्यक्त करले रहिट ।
भेलामे टमान पार्टीसे पार्टी परित्याग करके ६१ जाने माओवादी केन्द्रमे प्रवेश करले बटै ।
