टरटिहारहे लक्षित कैटी ट्राफिक सचेतना कार्यक्रम
पहुरा समाचारदाता
धनगढी, ८ कुँवार । टरटिहारहे लक्षित कैटी यहाँके यातायात व्यवसायीहुक्रे दुर्घटना न्यूनीकरण तथा ट्राफिक सचेतना कार्यक्रमके आयोजना करले बाटै ।
अन्य समयसे टरटिहारके बेला सवारी दुर्घटना ढिउर हुइना करल कहटी चालक, सहचालक ओ सरोकार वालाहुक्रनहे लक्षित कैटी ट्राफिक सचेतना कार्यक्रमके आयोजना करल सुन्दर सुदूरपश्चिम यातायात प्रालिके अध्यक्ष पदमराज सापकोटा बटैलै । उहाँ सक्कु चालकहे आपन सवारीसाधनहे चेकजाँच कैके किल संचालन कैना आग्रह करलै ।
ट्राफिक सचेतना कार्यक्रममे टमान वक्ताहुक्रे ट्राफिक प्रहरीसे चिट किल नैकाटके सवारीके अवस्था, यात्रुहुक्रनके चाप लगायत दुर्घटना न्यूनीकरणके उपाय बारे जानकारी करैना काम समेत करे पर्ना बटाइल रहिट । सुदूरपश्चिम प्रदेश प्रहरी कार्यालयके प्रमुख प्रहरी नायब महानिरीक्षक (डिआइजी) पुरूसोत्तम कंडेल सक्कु जाने टरटिहार मनैना मेरके सवारी चालकहे सावधानीपुर्वक सवारी संचालनके लाग आग्रह करलै ।
कार्यक्रमके बर्का पहुना समेत रहल डिआइजी कंडेल टरटिहारके बेला सक्कु जाने घरपरिवार नाटपाटनके अस्रा लागके बैठल बटैटी सवारी चलैनासे पहिले सवारीसाधनके अवस्था हेरके किल संचालन कैना आग्रह करलै ।
कार्यक्रममे कोभिड–१९ महामारीके बेला यातायात मजदुरके लाग उल्लेख्य भुमिका खेलल् कहटी सुन्दर सुदूरपश्चिम यातायात प्रालिके अध्यक्ष पदमराज सापकोटाहे सम्मान करल रहे ।
ओस्टके उहे कार्यक्रममे लकडाउनके बेला पेट्रोलियम ढुवानीमे अहोरात्र खटके सेवा पुगाइल लकहटी ट्यांकर चालक पुष्कर गुरुङहे समेत सम्मान करल रहे ।
धनगढीके बसपार्कमे आयोजना करल ट्राफिक सचेतना कार्यक्रममे सवारी चालक, सहचालक, अटो चालक, टमान मजदुर संगठनके सदस्य लगायतके उपस्थित रहल कार्यक्रममे उत्कृष्ट चालक तथा सहचालकहे सम्मान करल रहे ।
