थारू हारल बा !

अब्बे डलरसँग भारु हारल बा
डलर ओ भारुके भीडन्तमे
थारू हारल बा ।

डलर छाती ठोकठ्
भारु मुक्का पटकठ्
भित्रेभित्रे डलर भारु मिलल बटैं
डलर ओ भारुके बीचमे
नेपाली रुपैयाँके अवमूल्यन ?
नेपाली हुके अवमूल्यित हुइना फेन टे भुले हो
नेपाली हुके टे आझ थारु हारल बा ।

पहिले मुग्लानमे भीड रहे, कमुइयनके
अब्बे यूरोप, अमेरिकामे बा ।
काल्ह मुग्लानमे फेन वर्चस्व रहे
आझ सात समुन्दर पार बा ।
हम्रे दुनुओर कमजोर बटि
कमजोर हुइना फेन टे भुले हो
कमजोर हुके टे आझ थारु हारल बा ।

थारु चिमचाम रहे, सब स्वीकरले रहे
बस्तीमे आके टुँ सिखैलो, चेतना डेलो
अधिकारके परिभाषा बुझैलो
बदलाके आतिथ्यमे, दालभात डेलि
दारु पिवैलि, सिकार खवैलि
क्रान्तिकारीहे स्वीकार बा कलो
डकर डकर खैलो, अघला डेडे खवैलि
जा मग्लो ओहे डेलि, विश्वास कैलि
विश्वास कैना फेन टे भुले हो
विश्वास कैके टे आझ थारु हारल बा ।

बलटल बोल फुट टेहे
बोलटहि अपन पहिचानके लाग
नैसुन्लो हमार आवाज टुँ
नैसुनके गोली बर्सैलो
डुरवाइटो अभिनसम !
गोली खाके फेन चिमचाम बटि ।
चिमचाम सहना फेन टे भुले हो
सहेके टे आझ थारु हारल बा ।

का नैबोकैलो हम्रिहिनहे ?
झोला नैबोकैले कि बन्दुक ?
झोला बोक्लि
बन्दुक बोकके सहिद बन्लि
टुँ देश हक्लो
हम्रे चिमचाम घर लौट्लि ।
हमार मौनता टोहाँर लाग विजय बनल
टुँ सिंहदरबार छिरलो
हम्रे झोप्री लौट्ली
झोप्रीमे लौट्ना फेन टे भुले हो
लौट्के टे आझ
थारु हारल बा ।

सय रुपैयाँके तमसुक लाख बनल
मालपोत बुझैना बहानामे सारा सम्पत्ति लुट्लो
अक्षर नैजानल निहुँमे ल्याप्चे लग्वैलो
जग्गा जमिन सब अगोरलो
हम्रे कमैया बनके
दासता स्वीकारल करलि
स्वीकरना फेन टे भुले हो
दासता स्वीकारके टे
आझ थारु हारल बा ।

संविधान बनेबेर अधिकार मग्लि
सबजे  पैलैं, हम्रे नैपैलि
कोइ रोज रोज लेहल
हम्रे फेन मग्लि मने नैपैलि
पिटुवा पैलि
मारपिट सब सह्ली
सहना फेन टे भुले हो,
सब सहके टे
आझ थारू हारल बा ।

जरुइयन, गोली ठोक्ठै
हमार चेलीबेटिन् बलात्कार करुइया जल्लादहुक्रे
बस्ती जरुइया सब स्वतन्त्र बटैं ।
ओइनहे टोहाँर आशिर्वाद बा ।
हम्रे अन्याय सहके चिमचाम बटि
कोइ जेलमे बटि
कोइ परदेशमे बटि
टोहाँर न्यायिक आशातित नजरहे हेरटि
आशा करना फेन भुले हो
आशा करके टे
आझ थारु हारल बा ।

माग टे भौगोलिक सांस्कृतिक
पहिचानसहित प्रदेशके हो !
मने जातीय राज्यके झुठ आरोप लगाके
संसार झुक्याइटो
टब फेन हम्रे चिमचाम बटि
आरोपित हुके सहना फेन टे भुले हो
आरोप सहके टे
आझ थारु हारल बा ।

हम्रे टिना फेन बाँट्के खैठि
बाँट्के खैना हमार चलन हो
औरेक भाग छिनके खैना नियत नैहो
टुँ हमार भाग जबर्जस्ती छिन्लो
कपाकप खाडेलो
हम्रे मुलुरमुलुर हेरलि
टब फेन चिमचाम बटि ।
छिनुवा पाके समेत सहले बटि
अन्याय सहना फेन टे भुले हो
अन्याय सहके टे आझ
थारु हारल बा ।

टोहाँर झुठ बोलि सँच हुइल
हम्रे सँच बोललेसे झुठ ?
झुठ बोलके सरकार चलाइटो
हम्रे झुठ आश्वासनमे मख्ख बटि
अभिन टोहाँर विश्वासमे अल्झल बटि
विश्वास हमार पहिचान हो !
विश्वास करना फेन टे भुले हो
विश्वास कैके टे
आझ थारु हारल बा ।

टुहिनहे पटा बा, थारू दारु पियठ
दारु पिलेसे नशा चह्रठ
नशा चह्रके उन्माद ?
उन्माद् उन्मुक्ति खोजठ
उन्मुक्तिके उत्तर का रहठ
पटा बा ?
टबसे टे कना मौका फेन नैमिलि
थारु हारल !
थारू हारल बा !!
थारू हारल बा !!!

(अनुवादः प्रेम चौधरी)