‘हानिकारक परम्परा हटैना कर्रा’
पहुरा समाचारदाता
धनगढी, ९ कुवाँर । सुदूरपश्चिम प्रदेशके सामाजिक विकास मन्त्री लाल बहादुर खडका हानिकारक परम्पराहे एकचोट्टे परिवर्तन कैना कर्रा रहल बटैले बटै ।
४२औं सामाजिक सेवा दिवस ओ दिगो विकास लक्ष्य सप्ताहके अवसरमे आयोजित हानिकारक सांस्कृतिक अभ्यासके अन्त्य, दिगो विकास लक्ष्यमे सामाजिक क्षेत्रके योगदान विषयक अन्तरक्रिया कार्यक्रममे सामाजिक विकास मन्त्री खडका उ बाट बटाइल रहिट ।
उहाँ कहलै, प्रदेशमे ढेर हानिकारक सांस्कृतिक अभ्यास बा, एकचोट्टे हटाई खोजलपाछे आन्दोलन हुजाइठ, यिहीहे परिवर्तन कैना समय लागी ।
सुदूरपश्चिम प्रदेश छाउपडी प्रथा, देउकी प्रथा, बोक्सी प्रथा, धामी झाँक्री प्रथा व्याप्त रहल बा ।
उहे कार्यक्रममे मन्त्री खडका कृषिहे प्रथामिकता डेना बटैटी आव आवश्यकता अनुसार केल कृषि सामाग्री वितरण कैना बटैलै । प्रावधिक शिक्षा, बस्तु उत्पादन कैना सिखैली मन्त्री खडका कहलै, मने व्यवसायिकता कैनाफे सिखैना जरुरी बा ।
प्रदेश सरकारसे सक्कु यूवाहे स्वदेशमे रोजगारी डेहे सेक्ना अवस्था नइहो, दैनिक इण्डिया जउइयाके ताँटी बा, उहीहे रोके नइसेकल मने तथ्याङक रख्ना प्रयास करल बटैलै ।
बेरोजगारी हटैना प्रदेश सरकारसे व्यावसासिक फर्महे ५ लाखसे ५० लाखसम १ प्रतिशत अनुदानके कार्यक्रम नन्टी रहल बटैलै । यी अनुदानसे यहाँके यूवा स्वदेशमे व्यावसायिक फर्म संचालन करे सेक्ना उहाँ बटैलै ।
कोरोनाके कारण दुई बरस विद्यालय मजा संचालन नइहुइल मने विद्यार्थीनके कक्षा बृद्धि करल ओरसे शैक्षिक गुणस्तर घटल उहाँ कहलै । प्रदेश सरकार उच्च शिक्षामे सुधार कैना उद्देश्यसे विश्वविद्यालयके अवधारण नन्टी रहल बटैलै ।
उहे अवसरमे उहाँ सुदूरपश्चिम प्रदेशके यूवा लागु औषध दुव्र्यसनीमे फस्टी गैल बटैलै ।
गैरसरकारी संस्था महासंघके केन्द्रीय सदस्य सावित्रा घिमिरे दिगो विकास लक्ष्यमे हानिकारक सांस्कृतिक अभ्यासके अन्त्य, जातीय छुवाछुटके अन्त्य, भेदभावके अन्त्य, सक्कुहुनहे बराबर अधिकार लगायत १७ ठो लक्ष्य उल्लेख मने नारामे सिमित हुइल बटैली । उहाँ हानिकारक अभ्याससे समाज बाहेर आइनइसेकल बटैली ।
केन्द्रीय सदस्य घिमिरे दिगो विकास लक्ष्यहे स्थानीयकारण कैना जरुरी रहल बटैली । कार्यक्रममे वल्र्ड भिजनके फिल्ड निति तथा संचार प्रमुख विनय प्रकास बरालसे सुदूरपश्चिम प्रदेशमे २० अइनमे अवद्ध रहल ओ शिक्षा, पोषण, कोभिडके सन्दर्भके टमान कार्यक्रम करटी आइल बटैलै ।
कार्यक्रम गैर सरकारी महासंघ प्रदेश इन्चार्ज भवराज रेग्मीके अध्यक्षतामे हुइल रहे कलेसे संचालन गैर सरकारी महासंघ प्रदेश देवी खनाल करले रहिट ।
