घर, स्कुलिम चित्रकला
अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय धनगढीसे कञ्चनपुर जिल्लामे सञ्चालित स्थानीय समुदायहे सचेत परटि जिम्मेवार निकायहे जवाफदेही बनैना विद्यालय स्तरीय चित्रकला प्रतियोगिता करले बा ।
कञ्चनपुर कृष्णपुर नगरपालिकाके कृष्ण माध्यमिक विद्यालयमे गठित बालअधिकार चेतना समुहसे प्रतियोगितामे कक्षा छ से आठसम अध्ययनरत २५ जाने स्कुलियन सहभागि रहिट ।
चित्रकला प्रतियोगिता अन्तर्गत स्कुलियनहे अपन स्कुलिक चित्र बनाइ लगा जा गइल रहे । वास्टवमे लर्कापर्कन सिर्जनसिल बनाइक लग चित्रकलामे रुचि जगैना जरुरि बा । घरहि फेन खेलेबेर लर्का ढुरिम मेरमेरिक आकार बनाके खेल्ठाँ ओ रमैठाँ । अपन घर, घर जैना डगर, घरक् वरपर बिल्गैना रुखबरिख, मुर्गि चिङ्ना लगायट डिरिस्य ओइनके आँखिम नच्ठिन । ओइने उहे चित्र बनैठाँ ।
थारु समुदायमे चित्र बनैना ओटरा माहोल नैहो । पस्चिउँहा थारु समुडायमे अस्टिम्किम् किल लर्का चित्र बनाइ पैठाँ । डुठेहरु लर्कापर्का बर्का अस्टिम्कि बनैटि रलक हेर्के छुटकि अस्टिम्कि बनैठाँ । इ बाहेक चित्र बनैना अभ्यास नैहो । मैथिली चित्रकला अट्रा आगे जा सेकल, मने थारु चित्रकला उपर उठे नै सेक्ठो । थारु समुडायके चित्रकार आइ नै सेक्ठुइट ।
कमैया पृस्ठभुमिसे अइलक कैलालीक् मित्थु थारु अजकल थारु चित्रमे फड्को मर्ले बाटैं । उहाँ चित्र बनाके बहुट पुरस्कार जिट सेक्ले बाटै । दाङ चखौरा लगायट थारु संग्रहालयमे उहाँक् मुर्तिकला डेखे सेक्जाइठ । उहाँहे आजकल कामके चापाचाप बा । चित्रसे मजा कमाहि कर्टि बाटैं ।
सबजे मित्थुहस मजा चित्रकार भल्हि नै बने सेक्ठाँ । मने लर्कापर्कन छोटहिसे सिर्जनसिल काम सिखाइ सेक्लेसे आपन अपन समुडायके वकालट ओइने बहुट पाछेसम करे सेक्ठैं ।
लर्कन सिर्जनसिल बनैना चित्र मजा माढ्यम हो । अभिभावकलोग ओइन लग स्कुलिम पह्रना पोस्टा किल नाहिं, चित्र बनैना सरसमान फेन लान्डि । अपने बनाइल चित्रसे कोन्टि सजैना ओइन मौका डि । भविस्यके पिकासो, लैनसिंह बाङ्देल ओइनहे हुइट ।
