हमार न्यु फ्रेन्डस क्लब अपने लगानीमे बत्ती जडान
जीवन चौधरी
पहलमानपुर, ९ कुवाँर । कैलालीके घोडाघोडी नगरपालिका–११ अम्बासामे रहल हमार न्यु फ्रेन्डस क्लब अपने लगानीमे शनिच्चरके रोज ७५ हजार रुप्या बराबरके बत्ती जडान करले बा ।
क्लव अपने लगानीमे सडक पोलमे, मुख्य चोक, प्रतिक्षालय, सडकमे पर्ना बनक्षेत्रमे बत्ती जडान करल क्लवके संस्थापक अध्यक्ष छोटेलाल चौधरी बटैलै । अध्यक्ष कहलै, वत्ती लागलपाछे टिउशन पह्रना विद्यार्थीनहे बहुट सहुलियत बा, विद्यार्थीहुक्रे साँझके थोरिक साँझ ओ विहानके साढे ४/५ बजे टिउशन जाई पर्ना ओरसे मजा हुइल हो । बत्ती जोरसे एक ठाउँसे दुसर ठाउँ जैना सहजिल हुइनाके साथे उ क्षेत्रमे चोरी नियन्यण हुइना विश्वास करल बा ।
पहलमानपुर–लालबोझी सडक अन्तर्गतके सडकमे बत्ती जडानपाछे वेरीजुन ओ भिन्सारे आवातजावतमे सहजुल हुइल अध्यक्ष चौधरी बटैलै । पहलमानसिंह मेमोरियल प्राविधिक माविमे विहाने अन्धारमे टिउशन पह्रे जाई परठ, आब आवट जावटमे सहजुल हुइना विद्यार्थी हरिकिसुन चौधरी बटैले ।
क्लवके अध्यक्ष नवलसिंह रावल, संस्थापक सचिव नविनकिशाेर आचार्य, भल्मन्सा प्रमाेद चाैधरी, समाजसेवी शिवप्रसाद चाैधरी, ओ क्लवके सक्कु सदस्यहुकनहे पहलमे बत्ती लगागिल रहे ।
