एभरेष्ट एकेडेमीके ‘तेरी खान्या कोरोना’ नाटक उत्कृष्ट
पहुरा समाचारदाता
धनगढी, ९ कुवाँर । काठमाडौँमे सम्पन्न हुइल पहिल एसजी राष्ट्रिय एकल नाटक महोत्सवमे अत्तरियास्थित एभरेष्ट एकेडेमीसे प्रस्तुत करल नाटक ‘तेरी खान्या कोरोना’ उत्कृष्ट नाटकके उपाधि जिटना सफल हुइल बा ।
उ नाटकमे एभरेष्ट एकेडेमीके कक्षा दशके विद्यार्थी हेमन्त भट्टके अभिनय रहल रहे कलेसे नाटकके लेखन तथा निर्देशन पुष्पराज अवस्थी करले रहिट । अवस्थी विगत नम्मा समयसे काठमाडौँमे रङमञ्च तथा टमान टेलिसिरियलओर सक्रिय रुपमे काम करटी आइल बटै ।
देशभरसे करिब २५० के हाराहारीमे नाटक प्रतिस्पर्धाके लाग आइल रहिट । जौन मन्से ३० ठो नेपाली ओ १६ ठो अन्तराष्ट्रिय नाटक मञ्चनके निमित्त छनौट हुके उ मन्से ३ ठो नाटक उत्कृष्ट नाटकके रुपमे पुरस्कृत हुइल रहिट ।
जौन ३ ठो मन्से एभरेष्ट एकेडेमीके नाटकफे एक रहल रहे । कोरोनासे विद्यार्थीमे परल असरके बारेमे विषयवस्तु समावेश करके नाटक निर्माण करल रहे । नाटकमे सेट तथा लाईटमे सुनिल पन्त ओ दिपक भट्टराई सहयोग करले रहिट ।
भदौ २० गतेसे शुरु हुइल नाटक महोत्सवमे नाटक भर्चुअल विधिसे मञ्चन हुके कुवाँर ९ गते भौतिक रुपमे एक कार्यक्रमके आयोजना करके नतिजा प्रकाशन करटी महोत्सव समापन हुइल रहे । यी एकल नाटक महोत्सवके आयोजना स्वस्थीश्री गुरुकुलसे करल रहे कलेसे महोत्सवके संयोजक रङगकर्मि टंक चौंलागाई रहल रहिट ।
नाटकमे यी उपलब्धि एभरेष्ट एकेडेमीके लाग पहिल भर नइहुइट । यिहीसे पहिले गैल फागुनमेफे नेपाल सगिंत तथा नाट्य प्रज्ञा प्रतिष्ठान, शैली थिएटर ओ रुसी विज्ञान तथा सांस्कृतिक केन्द्रसे सयुक्त रुपमे आयोजना करल १२औं राष्ट्रिय बाल नाटक महोत्सवमेफे एभरेष्टके प्रस्तुती ओ निर्देशक पुष्पराज अवस्थीके लेखन तथा निर्देशन रहल नाटक ‘भुमिका’ फे उत्कृष्ट नाटकके उपाधि जित्न सफल हुइल रहे ।
यैसिक एभरेष्ट एकेडेमीसे विगत तिन वर्षसे टमान राष्ट्रिय नाटक महोत्सवमे प्रतिनिधित्व करके टमान उपलब्धि हासिल करटी आइल बा ।
