धनगढीमे परीक्षणकालीन लाइसेन्स वितरण शुरु

पहुरा समाचारदाता
धनगढी, १० कुँवार । यातायात व्यवस्था विभागसे २९ बरसपाछे यातायात ब्यवस्था ऐन लागु कैना निर्णय करलसंगे सुदूरपश्चिममे फेन उ निर्णय लागु हुइल बा ।

सवारी तथा यातायात व्यवस्था ऐन २०४९ से व्यवस्था करल परीक्षणकालीन चालक अनुमतिपत्र सुदूरपश्चिममे फेन वितरण शुरु हुइल हो । उ चालक अनुमतीपत्र वितरण शुरु हुइलसंगे १ बरससम चिट बोकके सवारी चलाइ पर्ना बाध्यता फेन अन्त हुइल बा ।

यातायात ब्यवस्था बिभागसे यातायात ब्यवस्था ऐन लागु करलसंगे सुदूरपश्चिममे फेन परीक्षणकालीन सवारी चालक अनुमतीपत्र वितरण शुरु हुइल बा । अँट्वारके एक कार्यक्रमके बिच प्रदेशके भौतिक पुर्वाधार बिकास राज्य मन्त्री चुनकुमारी चौधरी परीक्षणकालीन सवारी चालक अनुमतीपत्र वितरण कार्यके शुभारम्भ करल हुइटी ।

परीक्षणकालीन सवारी चालक अनुमतीपत्रके सुभारम्भ कैटी राज्यमन्त्री चौधरी आब चिट बोके पर्र्ना बाध्यताके अन्त्य हुइल बटैली ।

डगरामे चेकिङ हुइना ओ ओकर लाग चिट बोके पर्ना रहे राज्यमन्त्री चौधरी कहली ‘पानीसे भिज्ना, हेरैना झन्जटसे मुक्ति हुइल बा, यम्ने प्रदेश सरकारके पुर्ण सहयोग रहल बा ।’

१ बरस म्याद रहल उ अनुमतीपत्र क्यु आर प्रबिधिसे जाँच करे मिल्ना जनाइल बा । लाइसेन्सके परीक्षा उत्तीर्ण करल चालकहे १ बरसके लाग परीक्षणकालीन लाइसेन्स डेना सुरु करल हो । सुदूरपश्चिम प्रदेशमे डिजिटल सवारी चालक अनुमतीपत्र वितरण हुइलठनसे अनुमती पत्रके लाग १ बरससम अस्रा लागे पर्ना बाध्यता रहे ।

ऐनसे नै परीक्षा पास करल लगत्तै लाइसेन्स डेहे नैमिल्ना व्यवस्था करल रलेसे फेन बिचमे करिब ३० बरस परीक्षणकालीन लाइसेन्स वितरण बन्द करल रहे । चालकके सहजताके लाग परीक्षा पास करलपाछे अइसीन लाइसेन्स डेना व्यवस्था करल जनाइल बा । यातायात ब्यवस्था कार्यालय धनगढीके प्रमुख लक्ष्मण शाह सवारी तथा यातायात व्यवस्था ऐन, चालक अनुमतिपत्र (लाइसेन्स) के परीक्षामे उत्तीर्ण हुइलहे लाइसेन्स डेना व्यवस्था करल बटैलै ।

परीक्षा पास करलपाछे १ बरससम परीक्षणकाल राखके परीक्षणकालीन लाइसेन्स डेना व्यवस्था करल उहाँ बटैलै । १ बर्षे अवधीभर ५ ठो गल्ती करलमे लाइसेन्सनै खारेज हुइना ब्यवस्था करल शाह बटैलै । आब लाइसेन्सके परिक्षा पास करल १ सातामे परिक्षणकालिन अनुमतीपत्र लेहे सेकजैना यातायात कार्यालय जनैले बा ।