सुत्केरीहे बचैन हर प्रयास करली, मने नैसेक्ली: अस्पताल
पहुरा समाचारदाता
धनगढी, १० कुँवार । धनगढीके नवजीवन अस्पतालसे डाक्टरके कारणसे सुत्केरीके ज्यान नैगैल जनैले बा । शनिच्चरके रात डोटीके शिखर नगरपालिका ६ के २६ वर्षीया कल्पना सिंह मल्लके मृत्यु हुइल रहे ।
ओहकान मृत्युपाछे अस्पतालसे एक विज्ञप्ति जारी कैटी अस्पतालके विज्ञ टोलीसे रात दिन नैकहिके उपचार करलमे समेत विरामीहे बचाइ नैसेकल प्रति दुःख व्यक्त करले बा । ३९ हप्ताके गर्भवती समेत रहल मल्ल उ अस्पताललमे नियमित चेकजाँच करैटी आइल अस्पतालसे विज्ञप्तिमे कहले बा ।
विज्ञप्तिमे कहल बा, ’कुँवार ९ गते सकारे १० बजे पेट बठाके आइल विशेषज्ञ डाक्टरसे जाँच करेबर पाठेघरके मुह नरम किल होके एक घरमे खुलल् ओ ओम्ने पाछे औषधि डेके डगरा खुलैना प्रयास करेबर रात ११ बजके ४५ बजेओर बच्चा अइना डगरा पुरे खुलसेकल मने डाइक बच्चा जन्मैना बल नैपुगल जनाइल बा ।
ओस्टे बच्चा जन्मैना बल नैपुगलपाछे भ्याकुम प्रयोग कैके डेलिभरी कराइल जनाइल बा । पाछे बिरामीके अत्याधिक रक्तश्राव समेत बह्रल अस्पताल विज्ञप्तीमे कहल बा । अस्पतालसे तत्काले २ पिन्ट रगत चह्राके उपचारके लाग आइसियू ओ लगत्ते भेन्टिलेरमे राखके समेत उपचार कराइल जनाइल बा ।
विज्ञ टोलीके हर प्रयास करेबर फेन बचाइ नैसेकल अस्पताल जनैले बा । मने ओहकान आफन्त डाक्टरके लापरबाहीके कारण कल्पनाके मृत्यु हुइल कहटी अँट्वार सकारे अस्पतालमे तनाव सिर्जना समेत करल रहिट । बच्चाहे भर एनआईसीयूमे राखल बा ।
यहोर ओहकान चिकित्सकके लापरवाहीके कारण मृत्यु हुइल कहटी छानबिनके माग करल बा । उपचारमे संग्लन चिकित्सकके लापरवाहीके कारण सुत्केरीके मृत्यु हुइल कहटी मृतकके आफन्तसे छानबिनके माग करल हुइट ।
गर्भवति हुइलठनसे अस्पतालमे नियमित चेकजाँच करैटी आइल रलेसे फेन अन्तिम समयमे आके उपचारमे लापरवाही करल मृतकके काका तेज बहादुर सिंह बटैलै । ओस्टके नवजात शिशुके अवस्थाके विषय फेन अज्ञात रहल उहाँ बटैले बाटै ।
