असारमे टेलिपावर डेना सम्झौता, कुवाँरमेफे नैपैलैं
पहुरा समाचारदाता
धनगढी, १२ कुँवार । कैलालीके कैलारी गाउँपालिका–८, के देउकुमारी चौधरी असारमे अनुदान सामग्रीके लाग सम्झौता करलि । उहाँ स्थानीय श्रमशील महिला कृषि सहकारी संस्था लिमिटेडसँग अनुदानमे पैना मेरिक २५ हजार बुझैले बटि ।
‘कृषि यान्त्रीकरण अनुदानके लाग फारम खुलल पटा पाइलपाछे सहकारी संस्थासँग अनुदान पैना मेरिक पैसा डेहल हो,’ उहाँ कलि, ‘कुवाँरके आधा हुसेकल अभिनसम पैले नैहुइट ।’
कैचो आग्रह करलेसे फेन आइ कना जवाफ किल पाइल उहाँ बटैलैं । ‘धान कट्न सहजिलके लाग रिपर (धान कट्ना मेसिन) पैना आशामे पैसा बुझैनु,’ उहाँ दुखेसो पोख्लैं, ‘५ कठ्ठा धान काट सेक्नु अभिन आइल नैहो ।’ उहाँ ४ विघा जमिनमे धान खेती करटि आइल बा । कलि ओ सहजिलके लाग उहाँ रिपर खरिदे लागल हुइटि । मने, अनुदान डेना संस्थाके ढिलाइसे उहाँहे यी वर्ष फेन चिन्तित करैले बा । ‘रिपरके लाग सहकारीमे फोन करल करठु,’ उहाँ कलि, ‘मोर टोलमे ५ जहनके रिपर परल बा,’ उहाँ कलि, ‘मने कोइ फेन पैले नैहो ।’
कैलारी गाउँपालिका–७, मोहनपुरके इन्चल चौधरी गाउँपालिकामे ढरल सम्पर्क कार्यालयमे असारमे रिपरके लाग सम्झौता करलि । ‘धान लगैनासे आघे सम्झौता हुइल हो,’ उहाँ कलि, ‘धान पाकसेकल, मने अभिनसम नैआइल ।’ धान समेत काटसेकल उहाँ बटैलि । ‘रिपरके लाग ढरल पैसा खर्च हुसेकल,’ उहाँ कलैं, ‘कहाँ सम्पर्क करना हो उ समेत पटा नैहो ।’
श्रमशील महिला कृषि सहकारी संस्थाके अध्यक्ष सीता चौधरीसे कृषि उपकरण खरिद करना सप्लार्यस ढिलाई करके समस्या हुइल बटैलि । ‘किसानहुकनके सहजताके लाग हम्रे फाराम संकलन करल हुँ,’ उहाँ कलि, ‘मने, उपकरण न्ना टिकापुरके डिकम माईक्रो सिस्टम प्रालिसे पुगाइ नैसेकठ समस्या हुइल हो ।’ उहाँ अपन नियमित ताकेता डेटि आइल बटैलि । ‘किसानके धान पाक सेकल मने, उपकरण नैआइल,’ उहाँ कलि ।
कृषि विकास निर्देशनालय दिपायलसे आर्थिक वर्ष २०७७/०७८ के कार्यक्रम अन्तर्गत कृषि अनुदान सहयोग कार्यक्रम अन्तर्गत सुदूरपश्चिमके टमान जिल्लामे कृषि उपकरण डेहल हो ।
निर्देशनालयसे मिनि टिलर, पावर टिलर, धान थ्रेसर, गहुँ थ्रेसर, रिपर, रोटा भेटर, सिड ड्रिल लगायतके सामग्रीके लाग अनुदान कार्यक्रमके लाग सूचना प्रकाशित करल रहे ।
किसानके निवेदनके आधारमे अनुदान डेहल निर्देशनालयसे जनाइल बा । किसानसँग आधा रकम तिर्ना मेरिक अनुदान डेहल हो । कृषि ज्ञान केन्द्र ओ स्थानीय तहके सहकार्यमे अनुदानके लाग किसान छनौट करल हो । अनुदानके लाग ४ सय ठो निवेदन परल निर्देशनालय डोटी जनैले बा ।
कोरोनासे अनुदान कार्यक्रम कुछ प्रभावित बनल निर्देशनालय डोटीके सूचना अधिकारी केशव पाण्डे बटैलैं । ‘अनुदानके लाग ५ करोड रुपैयाँ हो । विविध कारण सब रकम खर्च हुइ नैसेकल,’ उहाँ कलैं, ‘कोरोनाके कारण किसानके घरसम पुगे नैसेकल डेढ करोड रुपैयाँ खर्च नैहुइल हो ।’ अर्थमन्त्रालय अन्तिम समयमे रकम निकास डेके फेन समस्या हुइल उहाँ बटैलैं ।
‘फिल्ड हेर्ना क्रममे बटुँ । सब फाइनल हुइलपाछे नैपाइलहुक्रे के कहिया पाइ कना रहठ । यदि सप्लायर्ससे बिल काटल बा कलेसे अब्बहि नै पैठैं । बिल नैकाटल रलेसे यी वर्षके बजेटमे पैहि ।’ सप्लायर्ससे निर्देशनालयमे बिल पेस करल जत्रा सब निकास हुसेकल उहाँ जानकारी डेलैं ।
