कैलाली जिल्ला तदर्थ समिति संयोजकमे माधव चौधरी
पहुरा समाचारदाता
धनगढी, १२ कुवाँर । नेपाल लोकतान्त्रिक पार्टी, थरुहट/थारुवान अभियान, नेवा अभियान, दलित अभियान, रिटर्नी प्रवासी अभियानके सयूक्त कैलाली जिल्ला स्तरीय भेला २०७८ मंगरके रोज लम्कीचुहामे हुइल बा ।
टिकापुर मुद्दा राजनितिक रुपमे समाधान कैना संघर्ष करी, सामुहिक नेतृत्व साझा विचार, सामुहिक निर्णय हाम्रो आधार कना नाराके साथ हुइल भेलासे यिहे अगहन ३ ओ ४ गते काठमाण्डौमे हुइना राष्ट्रिय सम्मेलन तयारीके भेला हुइल हो ।
भेलासे माधव चौधरीके संयोजकत्वमे २५ सदस्यीय कैलाली जिल्ला तदर्थ समिति गठन करल बा । समितिके सह–संयोजकमे देशराम चौधरी रहल बटै । कलेसे प्रवक्तामे चुनिराम चौधरी रहल बटै । समितिके सदस्यमे धनीराम चौधरी(गोदावरी, पार्वती चौधरी, मानबहादुर चौधरी (लम्कीचुहा), चक्रबहादुर चौधरी, जगत चौधरी, चतुरलाल चौधरी (जानकी), विना चौधरी टिकापुर, दिलिप चौधरी (भजनी), सुरज कठरिया, बलि थारु (घोडाघोडी, प्रदेशी चौधरी, सुरज चौधरी( गौरीगंगा), विकतलाल चौधरी, भोलेराम चौधरी (बर्दगोरिया), गोठुराम चौधरी, विददु राना (धनगढी) धनीराम चौधरी, जगदिश चौधरी, जगन्नाथ चौधरी, यम चौधरी (कैलारी) रहल बटै ।
कैलाली जिल्ला स्तरीय भेला माधव चौधरीके अध्यक्षतामे हुइल रहे । कलेसे खास बक्ता नेपाल लोकतान्त्रिक पार्टीके अध्यक्ष भानुराम चौधरी रहल रहिट । कार्यक्रममे नेवा अभियानके केन्द्रीय संयोजक सुमन सयमी, नेवा अभियन्ता रविन्द्र श्रेष्ठ, खडक चौधरी लगायत मन्तव्य व्यक्त करले रहिट । कार्यक्रमके संचालन चुनीराम चौधरी ओ स्वागत देशराज चौधरी करले रहिट ।
‘नेपालमे रहल राजनितिक दल प्राइभेट लिमिटेड जैसिन बा, काँग्रेसके देउवा, एमालेके केपी ओली, एमाले समाजवादीके माधव, माओवादी केन्द्रके प्रचण्ड, जसपाके बाबुराम, उपेन्द्र, लोसपा महन्थ ठाकुर रहल बा कलेसे हमार सामुहिक नेतृत्व रहल माधव चौधरी बटैलै । अगहन ३ ओ ४ गते काठमाण्डौमे हुइना राष्ट्रिय सम्मेलनसे सामुहिक नेतृत्व साझा विचार सहित फरक संरचना बन्ना उहाँ बटैलै ।
सम्मेलनसे अध्यक्ष मण्डल चयन हुइना उहाँ कहलै । लौव पार्टी बन्टी ओरसे ओम्ने थारु केल नाही सक्कु कलस्टरहे समेटके लैजैना ओ चुनाव चिन्ह नमस्ते रहना उहाँ बटैलै ।
