विद्यालयके नवनिर्मित तीन कोठे पक्की भवन उद्घाटन
पहुरा समाचारदाता
अत्तरिया, १३ कुवाँर । जिल्लाके कञ्चनपुर कृष्णपुरमे नवनिर्मित विद्यालय भवनके उद्घाटन करल बा । कञ्चनपुरके कृष्णपुर वडा नम्बर ७ कलुवापुरमे अवस्थित गौरीशंकर आधारभूत विद्यालयके बुधके एक कार्यक्रमके बीच नवनिर्मित विद्यालय भवनके उद्घाटन करल हो ।
आर्थिक वर्ष २०७७/०७८ मे कृष्णपुर नगरपालिका ओ विल्ड अन नेपालके आर्थिक तथा प्राविधिक सहयोगमे नवनिर्मित ३ कोठे पक्की भवनके समुद्घाटन बुधके कृष्णपुर नगरपालिकाके नगर प्रमुख कर्णबहादुर हमाल करले रहिट । विद्यालयहे नवनिर्मित ३ कोठे पक्की भवन ओ २ कोठे पक्की शौचालय स्तान्तरण समेत करल बा ।
कार्यक्रममे बोल्टी नगरप्रमुख हमाल शिक्षाके सक्कु क्षेत्र चुस्त दुरुस्त पारके आघे बढाई पर्ना, बालबालिकाहुकनके नैसर्गिक विकास करे पर्ना, संघसंस्थाके आर्थिक सहयोगमे कामहे आघे बढाई बटैलै । उहाँ बिल्ड अन नेपाल संगके सहकार्यमे उ भवनके निर्माण कार्य सम्पन्न करल बटैलै ।
अभिनफे ढेर जैसिन विद्यालय खुला आकास टरे बैठके पढन बाध्य हुइल, कक्षा कोठाके अभावमे ढेर संख्या एक्के कक्षामे पढाई पर्ना बाध्यताहे निकास डेहक लाग हम्रे यी वर्षफे बिल्ड अन नेपालसंगके सहकार्यमे अभिन ढेर विद्यालयके भवन निर्माण कार्य कैना नगरप्रमुख हमाल बटैलै ।
कृष्णपुर नगरपालिकासंग रहल ३३ ठो समुदायिक विद्यालयके भौतिक पुर्वाधार निर्माण करसेकल बटी, खुलकुद मैदान निर्माण करसेकल, फर्निचरके व्यवस्थापन, पुस्तकालयके व्यवस्थापनके साथे विशेष करके शिक्षा क्षेत्रमे आवश्यक पर्ना सक्कु वातावरण कायम करलफे उहाँ बटैलै ।
१० वर्षे शिक्षाके योजनामे निर्माण करटी शिक्षा क्षेत्रहे आघे बढैटी जैना बटैटी शिक्षा सक्कुहुनके लाग अनिवार्य हुई पर्ना ओ हमार गाउँठाउँ निर्माण, समाज, सम्भ्यता निर्माण, संस्कृति निर्माण, शिक्षाहे सक्कुहुनके आघे नाने सेक्लेसे केल देशके विकासफे हुइना नगरप्रमुख हमाल बटैलै ।
विद्यालयके निर्माण कार्य बैशाख २० गते से सुरु करलमे कोरोनाके कारण निर्माण कार्यमे कुछ समय लागे गैल रहे । यी भवन निर्माणके लाग कृष्णपुर नगरपालिकासे १० लाख लगाइल ओ बिल्ड अन नेपालसे फर्निचर सहित भवन निर्माणके लाग २६ लाख लगानी लगाइल हो ।
उ भवन विल्ड अन नेपालसे एलओकनर ओ एन स्टुडबेकर प्रतिष्ठानसे उ बालबालिकामे समर्मित बा, जेकर शिक्षासे कार्की कटानके सगर्व कार्की कटान, नेपाल समुदायसे निर्मित कहिके समर्पित करल व्यानर समेत लगाइल बा ।
उ कार्यक्रम विद्यालय व्यवस्थापन समितिके अध्यक्ष पदम दमाईके सभापतित्वमे हुइल कार्यक्रममे विशिष्ट पहुना बिल्ड अन नेपालके निर्देशक निर्मला चौधरी, बिल्ड अन नेपालके बोर्ड मेम्बर यज्ञराज चौधरी, कृष्णपुर नगरपालिका वडा नम्बर ७ के वडाध्यक्ष कमलसिंह भट्ट लगायतके उपस्थिति रहल रहे ।
