लेखी लोसपासे राजीनामा, एमाले छिर्ना आँकलन

पहुरा समाचारदाता
काठमाठौ, १४ कुवाँर । लोकतान्त्रिक समाजवादी पार्टी नेपाल (लोसपा) के केन्द्रिय सदस्य राजकुमार लेखी पार्टीके सक्कु पदसे राजीनामा डेले बटै ।

बिफेक रोज केन्द्रिय अध्यक्ष महन्थ ठाकुरहे बुझाइल राजीनामा पत्रमे लेखी उल्लेख करले बटै, अब नयाँ राजनीतिक यात्राके थालनी कैना निर्णय करल ओरसे पार्टीके सक्कु पदसे राजीनामा डेहल हु ।

अबके राजनीतिक यात्रा केहोर कना प्रश्नमे उहाँ यिहे पार्टी कहिके नइखुलैलै । उहाँ कहलै, हम्रे छोट पार्टीसे कांगे्रस, एमाले, माओवादी भारी दलहे बहुट गारी करली । मने, उ भारी दलसे छोट पार्टीफे कुछ करे नइसेक्ली । टबमारे, लोसपाके सक्कु जिम्मेवारीसे अलग हुइल बा ।

एमाले पृष्ठभूमिका लेखीसे २०६८ सालमे एमाले छोरके अपने अध्यक्षतामे नेपाल नागरिक पार्टी गठन करल रहे ।

थारु समुदायके छाता संगठन थारु कल्याणकारिणी सभा (थाकस) के महामन्त्री तथा नेपाल आदिवासी जनजाति महासंघके अध्यक्ष हुइल बेला थरुहट आन्दोलन तथा समग्रमे आदिवासी जनजातिके आन्दोलनके अगुवाइ करलै ।

राजेन्द्र महतोसे एक मधेस एक प्रदेश नइहुइलेसे अलग देश बन्न चेतावनी डेहे बेर राजकुमार लेखी सशक्त काउन्टरम उत्रलै । थारु मधेशी नइरहल, एक मधेश एक प्रदेश नइस्वीकर्ना कहटी देशव्यापी दौडाहामे लग्लै । मने, २०७४ बैशाखके पहिल साता उहाँ एकाएक उहाँ महतोके पार्टी राजपामे लुसुक्क छिरल रहिट ।

राजपासे लेखी प्रदेश सभाके चुनावफे लरलै । मने पराजित हुइलै । उहाँ प्रदेश २ के योजना आयोगके सदस्य बनाइल रहे । मने कार्यअवधि पुरा नइहुइटी हटागिलै । ओकरपाछे उहाँ जसपामेफे खासे सक्रिय नइरहिट ।

छोट दलप्रति लेखीके मोहभंगसे उहाँ फेर एमाले छिर्ना आँकलन करल बा ।