थप ८९८ कोरोना संक्रमित, १२ के मृत्यु
काठमाडौं, १४ कुँवार । बिटल २४ घण्टामे नेपालमे ८९८ जहनमे कोरोना भाइरस संक्रमण डेखाइल बा । स्वास्थ्य मन्त्रालयके अनुसार ८ हजार ५५५ पीसीआर परीक्षणमे बिफेक रोज थप ८९८ जहनमे संक्रमण पुष्टि हुइल हो । यी सँगे नेपालमे कोरोना भाइरससे संक्रमित हुइनाके संख्या ७ लाख ९५ हजार ६१ पुगल बा ।
अस्टेक एन्टिजेन विधिसे करल १ हजार ७८ परीक्षणसे १८० जहनमे पोजिटिभ डेखाइल बा । २४ घण्टामे पीसीआर ओ एन्टिजेन विधिसे करल ११ हजार ७६५ परीक्षणमे १ हजार ७८ जहनमे संक्रमण पुष्टि हुइल मन्त्रालय जनैले बा ।
पछिल्का २४ घण्टामे थप ९११ जाने संक्रमणमुक्त हुइल बटैं । हालसम ठिक हुइनाके संख्या ७ लाख ६५ हजार ७५८ रहल बा । नेपालमे कोरोना संक्रमणसे थप १२ जहनके मृत्यु हुइल बा । हालसम कोरोनासे मृत्यु हुइनाके संख्या ११ हजार १३५ पुगल बा ।
हालसम देशभर ४२ लाख ५ हजार ३८२ नमुनाके पीसीआर परीक्षण हुइल बा । क्वारेन्टाइनमे २३८ जाने रहल बटैं कलेसे आइसोलेसनमे संख्या १८ हजार १६८ जाने बटैं ।
मन्त्रालयके अनुसार पछिल्का २४ घण्टामे पूर्ण खोप प्राप्त करनाके संख्या २ लाख ८९ हजार ३८१ रहल बा ।
