मानवाधिकार रक्षकके अवस्था अध्ययन प्रतिवेदन उप्पर छलफल
पहुरा समाचारदाता
धनगढी, १४ कुवाँर । कोभिड–१९ के महामारीमे मानवाधिकार रक्षकके अवस्था अध्ययन प्रतिवेदन उप्पर विफेक रोज धनगढीमे छलफल हुइल बा ।
इन्सेक सुदूरपश्चिम प्रदेश कार्यालयके आयोजनामे तथा डिसिएके आर्थिक सहयोगमे कोभिड–१९ के पहिल ओ दुसर चरणमे मानवाधिकार रक्षकहुक्रे भोगल समस्या ओ अइना दिनमे अपनैना सावधानीबारे छलफल करल हो ।
इन्सेक सुदूरपश्चिम प्रदेश संयोजक खडकराज जोशी महामारीके बीच अपन जीउज्यानके प्रर्वाह नइकरके दिनरात यकर न्यूनिकरण तथा निर्मूल कैना खटल व्यक्ति मन्से स्वास्थ्यकर्मी, संचारकर्मी तथा मानवअधिकारकर्मीहुकनके वर्तमान अवस्था ओ भोगल समस्याबारे जानकारी डेहल रहिट ।
नेपालमे लकडाउनके सुरुवाटमे तीन महिनामे २५ जाने स्वास्थ्यकर्मी उप्पर दुव्र्यवहार हुइल, उहे अवधिमे प्रेस स्वतन्त्रता ओ पत्रकारउप्पर हिंसा सम्बन्धी १८ ठो घटना, २४ जाने पत्रकार पीडित/प्रभावित हुइल उहाँ जनैलै । उ अवधिमे चार प्रतिशत पत्रकार रोजगारी गुमाइल, ६ प्रतिशत पत्रकार वेतलबी विदामे बैठे परल, ९ प्रतिशत पत्रकारके तलब कटौटी, २० प्रतिशत नियमित तलब नइपाइल प्रतिवेदनमे डेखाइल बा । ओस्टेक कोरोनाके उ अवधिमे स्वास्थ्य सेवा, निःशुल्क पैना हक, रोजगारीके हक, शिक्षाके हक, स्वतन्त्र रुपमे नेंगघुम करे पर्ना जैसिन अधिकारके हनन हुइल उहाँ जनैलै ।
कार्यक्रममे सामाजिक विकास विकास मन्त्रालयके स्वास्थ्य महाशाखा प्रमुख नरेन्द्रसिंह कार्की कोरोनाके दुसर चरणके बेला स्वास्थ्यकर्मीके आभावके विचफे स्वास्थ्य सेवा डेहल बटैलै । प्रदेश सरकार ४ सय ८६ ठो स्वास्थ्यकर्मीके अस्थाई दरबन्दी सृजना करल बटैलै । गैल बरस १ सय २३ ठो स्वास्थ्यकर्मी लेगिल रहे । अब्बे ६ महिना ओइनहे निरन्तरता डेना कहल बा ।
प्रदेश सरकारके थेन अक्सिजन सिलिण्डर प्रयाप्त मात्रमे रहल ओरसे आबसे बच्चाके मास्क, एन्टिजेन किट, पोषणयूक्त खानाके प्याकेज दैडेना दाताहुकनसे आग्रह करलै ।
प्रदेश सरकारके उदेश्य सिमा नाकासे नेपाल प्रवेश कैना सब जनहनहे एन्टिजेन चेक कैना हो, ओकर विषयमे हम्रे आघे बह्रटीफे रहल बटी, महाशाखा प्रमुख कहलै । यिहीसे आघे गाउँगाउँमे एन्टिजेन पठाइल मने रिपोर्ट नइपठाडेना समस्या डेखल उहाँ बटैलै । कोरोनाके अवधिमे मिडिया व्रिफिङ ओ ग्रामीण क्षेत्रमे हेल्प डेस्क स्थापना करल महाशाखा प्रमुख बटैलै ।
‘कोरोनासे बाँचेक खोप लगैले बटी कहिके ढुक्क रहना अवस्था नइहो,’ उहाँ कहलै, ‘ यिहीसे बाँचेक स्वास्थ्य मापदण्ड अपनैटी हौसला प्रदान ओ खानपिनमे ध्यान डेहे पर्ना हो, मने विद्यालयमे जाके हेरी कैसिन अवस्था बा, राजनितिक गतिविधि हेरी कैसिन अवस्था बा, यहोरफे ध्यान जाई परल ।’ सरकार कोभिड नियन्त्रण कैना लक्षित समुहके खोप लगाजैटी बा, यकर स्वरुप परिवर्तन नइहुइलेसे सेभलेण्डिमे जाई सेक्ना उहाँ बटैलै ।
सेती प्रादेशिक अस्पतालके डा. शेर बहादुर कमर स्वास्थ्यकर्मीहुक्रे अपन सेकटसम मजा सेवा डेहल मने संचारकर्मीनहे सकारात्मक सन्देश प्रवाह कैना आग्रह करलै । ओस्टेक अस्पतालके नसिङ प्रमुख सीमा शर्माफे महामारीके वेला सकारात्मक सन्देश प्रवाह करलेसे संक्रमित मनैनके हौसाला प्रदान करे सेक्ना बटैली ।
कार्यक्रममे दलित महिला अधिकार मञ्चके अध्यक्ष सावित्रा घिमिरे, ओरेक नेपालके कार्यक्रम अधिकृत गिता चौधरी लगायत कोभिड–१९ के पहिल चो दुसरा चरणके बेला भोगल अनुभव सुनैने रहिट ।
