चेतनशीलके १५ औं साधारण सभा

पहुरा समाचारदाता
हसुलिया, १५ कुवाँर । चेतनशील महिला विकास बहुउद्देश्यीय सहकारी संस्था लिमिटेडके १५ औं साधारण सभा उसरल बा ।

कैलाली जिल्लाके कैलारी गाउँपालिका वडा नम्बर ५ पवेरामे रहल चेतनशील महिला विकास बहुउद्देश्यीय सहकारी संस्था लिमिटेडके बिफेक रोज पबेरामे एक कार्यक्रम कैके १५ औं साधारण सभा उसरल हो ।

कार्यक्रममे बर्का पहुना रहल कैलारी गाउँपालिकाके अध्यक्ष लाजुराम कलैं– ‘अब्बेक समयमे गाउँ घरमे महिला ओइने सहकारी से अपन दैनिक गुजारा चलैना सहज हुइल बटैलैं ।’ उहाँ आघे थप्लैं– ‘सहकारीसे हमार समाज चलल बा ।’ ओहेमारे एक सहकारी एक उद्योग हुइ पर्ना बटैलैं ।

ओस्टेके विशिस्ट अतिथि वडा नम्बर ५ के वडाध्यक्ष विष्णु चौधरी कहलैं– ‘आप पुरुस किल नाही महिला ओइने फेन अपन समाजके लाग जागरुक ओ चेतनशिल हुइटी गैल बटैं ।’ उहाँ फेन आप गाउँक् महिला फेन अपन गोरम् ठर्ह्या सेकल बटैं ।

यी सहकारीमे आवद्ध होके काम कर्टी आइल उत्कृष्ट रिन सदस्य असिया देवी चौधरीहे, उत्कृष्ट शेर सदस्य मीना चौधरी, ओस्टेके उत्कृष्ट छेगरी पालनमे हिरा चौधरी, उत्कृष्ट केरा खेतीमे दिल्लु चौधरीहे फेन पुरस्कृत कैगैल बा ।

इहे मौकामे संचालक समितिके हिरा चौधरी, कृष्णा चौधरी, कृष्णी चौधरी, मञ्जु चौधरी, सुशीला चौधरीहे फेन सम्मान कैगैल रहे ।

कार्यक्रममे कैलारी गाउँपालिका बालबिकास शाखाके प्रमुख बालकुमारी चौधरी, पारदर्शी महिला विकास बहुउद्देश्यीय सहकारी संस्थाके व्यवस्थापक कौशी बोहरा, वनदेवी कृषि सहकारी संस्थाके उपाध्यक्ष तीर्थ नेपाल, शेर सदस्य पुष्पा चौधरी, ललिता चौधरी, कैलारी गाउँपालिका वडा नम्बर ५ के वडा सदस्य अनारकली चौधरी फेन अपन अपन मन्तव्य डेले रहिंट ।

अध्यक्ष हिरा चौधरीके घरगोसियाइमे हुइल कार्यक्रममे उपाध्यक्ष सुशिला चौधरी स्वागत मन्तव्य डेले रहिंट । सचिव बनिता चौधरी २०७७/०७८ के २ करोड ५७ लाख ३४ हजार ३६२ बराबरके आयव्यय प्रस्तुत कैले रहिंट कलेसे सहजीकरण सह व्यवस्थापक तीर्थ चौधरी कैले रहिंट । इहे अवसर मे जनचेतनामूलक सडक नाटक फेन डेखागैल रहे ।