शिक्षाहे स्वास्थ्यसंग जोरके लैजाई परलः मन्त्री खडका
पहुरा समाचारदाता
धनगढी, १७ कुवाँर । सुदूरपश्चिम प्रदेशके सामाजिक विकास मन्त्री लाल बहादुर खडका शिक्षाहे स्वास्थ्यसंग जोरके लैजाई पर्ना बटैले बटैले बटै । ‘सुदूरपश्चिम प्रदेश सरकारसे तयार करल बालबालिका शिक्षा ओ स्वास्थ्य सुरक्षासंग सम्बन्धी कोभिड–१९ प्रतिकार्य योजना यकर कार्यान्वयन अवस्था ओ चुनौती विषयक’ धनगढीमे शनिच्चरके हुइल एक कार्यक्रममे मन्त्री खडका यी विषम परिस्थितिमे स्वास्थ्य ओ शिक्षाहे जोरके आघे बह्रे पर्ना बेला आइल बटैलै ।
‘कोभिड–१९ के पहिल ओ दुसरा चरण पार करेबेर ढेर सिकाई हुइल ’ मन्त्री खडका कहलै, –‘शिक्षा ओ कोभिडहे साझा मुद्दा बनाके लैजाई नइसेक्लेसे टिसरा चरण अइलेसे भारी क्षति हुई सेकी । कोरोनाके टिसरा लहर रोक्न प्रदेश सरकार टमान गतिविधि ओ तयारीमे जुटलफे मन्त्री खडका बटैलै ।
सामाजिक विकास राज्यमन्त्री मना साउद सरकारसे नानल विद्यालय संचालन कार्यविधिके पालन करके विद्यालय संचालन करडेना आग्रह करली । कोरोनाके मारमे विद्यार्थी तथा बालबालिका परल ओरसे अनलाइन कक्षाके सट्टा स्वास्थय मापदण्ड अपनाके सामाजिक दुरी कायम करटी भौतिक रुपमे विद्यालय संचालनमे उहाँ जोड डेली ।
सुदूरपश्चिम प्रदेशके सामाजिक विकास सभापति कुन्ती जोशी खोप, योजना पहँुचके आधारमे पाइल गुनोस आइल बटैली । जनताके प्रतिनिधि हुइलपाछे सक्कुुहुनके साझा बने नइसेक्लेसे कबु विकास नइहुइना उहाँ बटैली । तराई होस पहाड सक्कु ठाउँमे समान विकास हुइना जरुरी रहल उहाँ बटैली ।
सामाजिक विकास मन्त्रालयके स्वास्थ्य महाशाखा प्रमुख नरेन्द्रसिंह कार्की बालबालिकामे कोभिड–१९ रोकथाम उपचार ओ व्यवस्थापन सम्बन्धी प्रस्तुतीकरण करटी सिमानाकामे हेल्थ डेस्का सेवा संचालन करल बटैलै । कोरोनाके दुई लहर पार करल बटैटी अब्बे बालबालिकाके लाग अलगे बेड सहितके बालमैत्री अस्पतालके स्थापना करटी रहल उहाँ बटैलै ।
लुनिभा बाल सरोकार समुहके कार्यकारी निर्देशक नरेन्द्र डंगौल कोरोनाके कारण बालबालिका ढेर प्रभवित हुके पढनसे बन्चित हुइल बटैलै ।
पञ्चोदय माविके प्रअ हरिशकुमार ओझा डशिया डेवारीके विच कोरोनाके टिसर लहर अइना सक्कुहुनके आकलन रहल ओरसे सुरक्षा अपनाके सक्कु जाने विद्यालय संचालन करे पर्ना बटैलै ।
विद्यार्थी लक्ष्मी जोशी फरक क्षमता रहल, अपाङगता बालबालिका ढेर कोरोनाके मारमे परल बटैली । कोरोनाके बेला पढाई संचालन कैना नाउँमे अनलाईन कलस संचालन करेबेर बालबालिकामे झन विकृति बढल बटैली । पत्रकार प्रकाश विक्रम शाह कोरोनाके बेला यहाँ उपचार नइहुके भारी मनै काठमाण्डौ उपचार कराई गैल ओरसे यहाँ हुइना उपचार सर्वसाधारणके लाग केल रहल जैसिन भान हुइल उहाँ बटैलै । उहाँ कहलै यहाँ भौतिक पूर्वाधार निर्माण करल मने उपचारमे काहे विभेद, तराई ओ पहाडमे सम्मान विकास हुइना जरुरी बा ।
युनिसेफ नेपालके इन्द्र प्रकास गुप्ता कहलै अब्बे सक्कु सामुदयिक तथा निजि विद्यालय खुलल बा मने स्वास्थ्य मापदण्ड अपनाइल नइहो । सुरक्षित विद्यालय संचालन करेक लाग ऐन ल्याउन आवश्यक रहल उहाँ बटैलै ।
सेती प्रादेशिक अस्पतालके डा. शेरबहादुर कमर छोट कोठामे ढेर विद्यार्थी ढारके पढैटी रहल मने अनुगमन नइहुइल बटैलै । कार्यक्रम सुदूरपश्चिम प्रदेशके शिक्षा निर्देशक गणेश बहादुर सिंहके अध्यक्षतामे हुइल रहे ।
