घोडीघोडी–यूनिक विचके मर्ज अन्तिम चरणमे

पहुरा समाचारदाता
धनगढी, १६ कुवाँर । घोडीघोडा लघुवित्त वित्तीय संस्था लिमिटेडके पहिल विशेष साधारण सभा शनिच्चरके रोज धनगढीमे हुइल बा । सस्थाके अध्यक्ष प्रभातकुमार चौधरी विशेष साधारण सभामे मर्जके वैधानिक सम्बन्धमे, संस्था मर्जर सम्बन्धी संचालक समितिके प्रतिवेदन सम्बन्धमे ओ सभाके माइनुटमे दस्तखात कैना अख्तियारी सम्बन्धमे छलफल हुइल बटैलैं ।

सस्थाके प्रमुख कार्यकारी अधिकारी कुन्नुनारायण चौधरीले नेपाल राष्ट्र बैंक १८ से १५ प्रतिशतमे व्यायदर घटाइलपाछे अप्ठ्यारो हुइल बटैलैं । अब्बेसम पुुँजीके आभाव रहटी रहटीफे १ अर्ब २७ करोड ९९ लाख २५ हजार लगानी कैना सफल हुइल बटैलै । ९० करोड ८७ लाख असुलीफे करल ओ अब्बे ३७ करोड १२ लाख १८ हजार लगानीमे रहल बटैलै । युनिक नेपालके ढाई लगानी रहल बा । शेयर पुँजीफे ढेर रहल बटैलै ।

कार्यक्रममे सुदूरपश्चिम प्रदेशसभा सदस्य तथा संस्थाके संस्थापक सदस्य मालामति राना संस्थाहे आघे बढाइक लाग सक्कु क्षेत्रके प्रतिनिधित्व हुइना आवश्यक रहल बटैले बटी । घोडीघोडा लघुवित्त वित्तीय संस्था विपन्न वर्गके महिलाहे आत्मनिर्भर बनाइल बटैली । यी व्यावसायिक लोण लेहल महिलाके स्तर बह्रलफे उहाँ बटैली ।

कार्यक्रममे संचालक समिति सदस्य पुरन चौधरी संस्थाके बारे जानकारी डेटी माघ महिनासम यूनिक नेपालसे मर्ज हुइना बटैलै । ओस्टेक संस्थापक सदस्य जीउलाल चौधरी यूनिक नेपालसे मर्ज हुइलेसे सक्कु शेयर सदस्य बराबर हक लागे पर्नामे जोड डेहल रहिट । कार्यक्रमके संचालन संस्थाके कम्पनी सचिव नरेन्द्र लम्साल करल रहिट ।