भारतीय सावारी साधान फेन आइ पैना

पहुरा समाचारदाता
धनगढी, १७ कुँवार । कोभिड १९ के कारण बन्द हुइल नेपाल भारतके सीमानाका अँट्वारसे खुला करल बा । अँट्वारसे भारतीय नम्बर प्लेटके सावरी साधन फेन नेपाल आइ डेहे लागल बा ।

कैलालीमे फेन अँट्वारसे भारतसे अइना भारतिय नम्बर प्लेटके सवारी साधनहे समेत छुट डेहल कैलालीके प्रमुख जिल्ला अधिकारी खगेन्द्रप्रसाद रिजाल जानकारी डेलै । भन्सारके कर्मचारीहुक्रे आपन अफिसियल काम कैना बाँकी रहल ओरसे अँट्वारसे सक्कु प्रकृया पुरा कैके सिमानामे आवागमन सहज हुइना प्रमुख जिल्ला अधिकारी रिजाल जानकारी डेलै ।

‘भारतके लखिमपुर जिल्ला खिरीके डिएम संग बातचित हुइल बा’ कैलालीके प्रमुख जिल्ला अधिकारी रिजाल कहलै–‘नेपालसे भारत ओर जैना फेन सहज हुइना बा ।’ यात्रु बोकल वा नै बोकल भारतीय निजी सवारी साधन आब शर्तसहित नेपाल आइ डेना जनाइल बा ।

उप्परका निकायके आदेशपाछे भारतीय निजी सवारी साधन नेपाल प्रवेश खुला हुइल त्रिनगर भन्सार कार्यालय धनगढी जनैले बा । त्रिनगर प्रहरी चौकिके इन्चार्ज प्रहरी नायव निरिक्षक रमेश शाहीके अनुसार भारतीय नम्बर प्लेट रहल सवारी आवतजावत कैना डेहल बा । आब भर ७२ घण्टा भिट्टरके स्वास्थ्य परिक्षण रिपोर्ट रहल भारतीय नागरिक अपने निजी सवारी मार्फत नेपाल आइ पैना बाटै ।

भारतसे अउइया नागरिक ढिउरमे ७ दिनके लाग एकचोके कारके लागि पाँच सय, मोटरसाइकलके लाग १ सय ५० ओ टेलरसहितके ट्याक्टरके लाग ७ सय ५० रुपैयाँ भन्सार काटे पर्ना रहल बा ।