मुख्यमन्त्री कपके विजेताहे ढाई वर्षपाछे पुरस्कार
पहुरा समाचारदाता
धनगढी, १८ कुवाँर । धनगढीमे २०७५ साल चैतमे सम्पन्न मुख्यमन्त्री कप अन्तर प्रदेश खेलकुद प्रतियोगिता च्याम्पियन टोली सुदूरपश्चिम प्रदेशके खेलाडी ढाई बर्षपाछे पुरस्कार रकम पैना हुइल बटै ।
सुदूरपश्चिम खेलकुद परिषद पुरस्कार रकम कुवाँर २० गते प्रदेश स्तरीय भलिबल प्रतियोगिताके उद्घाटन समारोहमे उ रकम खेलाडीहुकनहे डेना हुइल हो ।
ढाई बर्षसम सुदुरपश्चिम खेलकुद विकास समिति ओ प्रदेशके सामाजिक विकास मन्त्रालयके संयुक्त खातामे रहल रकम बल्ल आके खेलाडीहे वितरण कैना हुइल हो । खेलाडी जिटके पुरस्कार नइपाके निराशा पैदा हुइल अवस्थामे खेलकुद विकास समिति ओ मन्त्रालयसंग लरके रकम मागल सुदुरपश्चिम खेलकुद परिषद्के सदस्य सचिव दिपकवहादुर सिंह जानकारी डेलै । उहाँ उ रकमहे खेलाडीहुकनके पदक अनुसार वितरण कैना बटैलै ।
उहाँक अनुसार व्यक्तीगतओर पहिल हुइनाहे ३५ हजार दुसरा हुइलहे २५ हजार ओ टिसरा हुइल १५ हजार नगद डेजाई । ओस्टेक समुहओर पहिल हुइल टीमहे जनही २८ हजारके दरसे रकम प्राप्त करही । ओस्टेक खेलके प्रशिक्षकसे प्रतिव्यक्ती नगद ११ हजार प्राप्त करही ।
प्रतियोगितामे आयोजक सुदुरपश्चिम प्रदेश ३ स्वर्ण, १ रजत ओ ३ कास्य सहित च्याम्पियन बनल रहे । च्याम्पियन टोली १५ लाख नगदमे सरकारी कर कट्टा करके ११ लाख २५ हजार रकमहे वितरण कैना हुइल बा ।
