सुदूरपश्चिम प्रदेश स्तरीय भलिबल प्रतियोगिता हुइना
पहुरा समाचारदाता
धनगढी, १८ कुँवार । धनगढीमे सुदूरपश्चिम प्रदेश स्तरीय भलिबल प्रतियोगिता सञ्चालन हुइना हुइल बा ।
सुदूरपश्चिम खेलकुद परिषदके आयोजनामे कुँवार २० से २३ गतेसम प्रदेश स्तरीय भलिबल प्रतियोगिता सञ्चालन हुइना हुइल हो । सोम्मारके धनगढीमे पत्रकार सम्मेलनके आयोजना कैटी खेलकुद परिषदके सदस्य सचिव दीपक सिंह कैलाली ओ कञ्चनपुरसहित ९ जिल्लाके टीमके सहभागितामे प्रतियोगिता सञ्चालन हुइ लागल जानकारी डेलै ।
खेलकुद परिषदके वार्षिक कार्यक्रम अन्तरगत राष्ट्रिय टिम बनैना लक्ष्यके साथ प्रतियोगिता आयोजना करे लागल बटैटी सिंह ढिरेसे अन्य खेलकुद प्रतियोगिता फेन सञ्चालन कैना बटैलै ।
राष्ट्रिय खेल समेत रहल भलिबल सुदूरपश्चिममे सबसे ढिउर खेलजैना करल उहाँ बटैलै । प्रतियोगिता अन्तरगत पहिल हुउइया एक लाख नगदसहित ट्रफी, द्धितिय हुउइया ५० हजार रुपैयाँ नगदसहित ट्रफी, टिसर ओ चौठा हुउइया २५/२५ हजार रुपैयाँसहित ट्रफी तथा टमा विधाके उत्कृष्ट खेलाडीहे फेन पुरस्कृत करजैना बा ।
सदस्य सचिव सिंह सुदूरपश्चिम प्रदेश सरकारके आयोजनामे सञ्चालन हुइल मुख्यमन्त्री कपके विजेता खेलाडीहे उद्घाटन समारोहमे नगद पुरस्कारसहित सम्मान फेन करजैना बटैलै ।
