प्रदेशस्तरीय भलिबल प्रतियोगिता, अछाम ओ बझाङके टिमहे कारबाही

धनगढी, २३ कुँवार । धनगढीमे जारी सुदूरपश्चिम प्रदेशस्तरीय प्रथम भलिबल प्रतियोगितामे अछाम ओ बझाङके टिमहे कारबाही हुइल बा । डुनु टिम रेफ्रीके निर्णय अस्वीकार कैटी आधा खेलमे कोर्ट छोरलपाछे कारबाही करल सुदूरपश्चिम प्रदेश खेलकुद परिषद् जनैले बा ।

परिषद्के सदस्य सचिव दीपक सिंह खेलमे अनुशासन नैडेखाइल कहटी टिमहे कारबाही करल बटैलै ।‘डुनु टिम रेफ्रीके निर्णय अस्विकार कैटी बिच्चेमे खेल छोरल रहिट,’ सिंह कहलै, ‘उहाँहुक्रनहे प्रतियोगिताके बाँकी खेल खेले नैपैना मेरके कारबाही करल बा । प्रतियोगिता ओराइलपाछे थप कारबाहीके प्रक्रिया आघे बह्री ।’

बिफेक हुइल डोटी ओ अछामबिचके खेलमे अन्तिम सेटमे विवाद कैटी अछाम खेल छोरल रहे । बिफेक रोज हुइल बझाङ ओ बैतडीके खेलमे बझाङसे विवाद कैटी खेल बिचमे छोरल रहे । उ क्रममे प्रहरी ओ खेलाडीबीच हात हालाहाल हुइल रहे ।

धनगढीमे जारी प्रतियोगिताके विजेताहे नगद एक लाखसहित ट्रफी डेजैना बा । प्रतियोगिताके उपविजेताहे नगद ५० हजारसहित ट्रफी डेजैना बा कलेसे प्रतियोगिताके सेमिफाइनलसम पुगुइया दुई टीमहे पच्चिस पच्चिस हजार नगदसहित ट्रफी डेजैना बा । टमान ५ ठो विधाके उत्कृष्ट खेलाडीहे फेन पुरस्कार डेजैना बा । सुदूरपश्चिम प्रदेश खेलकुद परिषद्के आयोजनामे प्रतियोगिता हुइटी रहल बा ।