भुमि अधिकार अभियान शुभारम्भ
पहुरा समाचारदाता
धनगढी,२४ कुवाँर । सुदुरपश्चिम प्रदेशके ९ जिल्लासे एक साथ शुरु हुइना करके भुमि अधिकार अभियान शुभारम्भ सुदुरपश्चिम प्रदेशके मुख्यन्याधिवक्ता माननीय कुलानन्द उपाध्याय शनिच्चरके रोज एक कार्यक्रमके विच उदघाटन करलै ।
अपन सोसाईटी फाउण्डेसन ओ राष्ट्रिय दलित नेटवर्क नेपालके संयुक्त साझेदारीमे सुदुरपश्चिम प्रदेशके ९ जिल्लामे संचालन हुइना भुमि अधिकार अभियानके उदघाटनके अवसरमे बोल्टी मुख्यन्यायधिवक्ता माननीय कुलानन्द उपाध्याय भुमि सम्बन्धी तिनु तहके साझा अधिकार स्पष्ट हुई पर्ना ओ ओकर लाग नीति निर्माण कैना सामुहिक पहल करे पर्ना बाट औल्यइलै । उहाँ जनताके जीवन, सम्पती ओ स्वतन्त्रताके लाग राज्यसे दायित्व निर्वाह करे पर्ना ओ ओकर लाग संविधानके मुल भावना, मर्म अनुसार कानून निर्माण हुई पर्ना बाटमे जोड डेलै ।
कार्यक्रमके विशिष्ट पहुना एवं संविधानसभा सदस्य माननीय हरि श्रीपाईली दलित भुमिहिनके समस्या सामाधानके लाग सरकारसे आवश्यकतामे आधारित कानून निर्माण नइकरल ओ रहल नीति तथा कार्यक्रमके कार्यान्वयनमे राजनितिक ईच्छा शक्तिके आभाव रहल बटैलै ।
राष्ट्रिय दलित नेटवर्क नेपालके संस्थापक अध्यक्ष गणेश बि. के. अव्यवस्थित बसोवासीहुकनके भुमि समस्या हल कैना आम सचेतीकरण आवश्यक रहल ओ ओम्ने सामुहिक आवाज बुलन्द कैना दलित भुमिहिनहुकनके संगठन निर्माण करके परिचालन कैना भुमि अधिकार अभियान कोशेढुंगा सावित हुइना बाट औल्यइलै ।
कार्यक्रमके उदघाटनसत्रमे नेपाल पत्रकार महासंघके केन्द्रीय सचिव हेमकर्ण बि. क, नेपाल पत्रकार महासंघके पुर्व सुदुरपश्चिम ईन्चार्ज प्रकाश बिक्रम शाह, राष्ट्रिय मुक्त हलिया समाज महासंघ नेपालके अध्यक्ष ईश्वर सुनार, समता मिडिया सेन्टरके कार्यकारी अध्यक्ष मिलन परियार, फाया नेपालके संस्थापक अध्यक्ष शेरबहादुर बस्नेत, हयाबिटयाट फर हुमनिटीके राममणी चौधरी, याक नेपालके महासचिव हृदय पुजारा, भुमि अधिकार मंच कैलालीके अध्यक्ष लक्ष्मण बि.के., दलित गैरसरकारी संस्था महासंघके सुदुरपश्चिम प्रदेश संयोजक खडक बि. के. लगायत शुभकामना व्यक्त करलै ।
राष्ट्रिय दलित नेटवर्क नेपालके केन्द्रीय सदस्य गिता सोव (नेपाली) संचालन करल कार्यक्रममे अभियानके खाका बारे टीम लिडर हुकुम ब. सार्कीं प्रस्तुती करलै । परियोजना संयोजक पार्वती स्वागत करल कार्यक्रम संस्थाके कार्यवाहक अध्यक्ष मोहन ओडके अध्यक्षतामे सम्पन्न हुइल रहे । दुई दिनसम चल्न उ कार्यशाला गोष्ठीसे भुमि सम्बन्धी सवालमा जनवकालत करेक लाग रणनितिक योजना निर्माण हुइना बाट आयोजक जनैले बा ।
